1Bakang Jehofa;
lo bakeng leina la ga Jehofa;
lo mmakeng lona batlhanka
ba ga Jehofa;
2lona ba lo emang mo ntlong
ya Jehofa, mo malwapeng
a ntlo ya Modimo wa rona.
3Lo bakeng Jehofa;
gonne Jehofa o molemo;
opelelang leina la gagwe dipako;
gonne go monate.
4Gonne Jehofa o ikgethetse Jakobe
go nna wa gagwe ka sebele,
le Iseraele go nna khumo
ya gagwe e e tlhophegileng.
5Gonne ke a itse
fa Jehofa a le mogolo,
le go re Jehofa wa rona
o godimo ga medimo yotlhe.
6Sengwe le sengwe se Jehofa
o se ratileng o dirile sone fela,
kwa legodimong le mo lefatsheng,
mo mawatleng le mo mafelong
a a boteng otlhe fela.
7O tle a tlhatlose mouwane
kwa dikhutlong tsa lefatshe;
a direle pula dikgadima;
a ntshe phefo mo dibolokelong
tsa gagwe.
8Ke yo o na a itaya
matsalwapele a Egepeto,
a motho le a kgomo.
9O ne a baya ditshupo
le dikgakgamatso
mo gare ga gago Egepeto,
mo go Faro, le mo batlhankeng
ba gagwe botlhe fela.
10Yo o ne a itaya merafe e le mentsi,
a bolaya dikgosi tse di thata:
11Sihone kgosi ya Baamore,
le Oge kgosi ya Bašane,
le magosi otlhe a Kanana;
12a aba lefatshe la bone
go nna boswa,
boswa jwa ga Iseraele,
tšhaba ya gagwe.
13Leina la gago, Jehofa,
le eme ka bosakhutleng;
segopodiso sa gago, Jehofa, se ntse
mo tshikatshikeng tsotlhe fela.
14Gonne Jehofa o tlaa atlhola batho
ba gagwe,
mme o tlaa ikwatlhaya ka ga
batlhanka ba gagwe.
15 Medimo ya disetwa ya merafe
ke selefera le gouta,
tiro ya diatla tsa batho.
16E na le melomo, mme ga e bue;
e na le matlho, mme ga e bone;
17e na le ditsebe, mme ga e utlwe;
mme le gone ga go na mowa
mo melomong ya yone.
18Ba ba e dirang
ba tlaa tshwana nayo fela;
ee, mongwe le mongwe
yo o e ikanyang.
19Lona ba ntlo ya ga Iseraele,
bakang Jehofa;
lona ba ntlo ya ga Arone,
bakang Jehofa;
20lona ba ntlo ya ga Lefi,
bakang Jehofa;
lona ba lo boifang Jehofa,
lo bakeng Jehofa.
21A go bakwe Jehofa mo Sione,
yo o agileng kwa Jerusalema.
Bakang Jehofa.
Who We AreWhat We EelieveWhat We Do
2025 by iamachristian.org,Inc All rights reserved.
