1Jehofa ke lesedi la me,
le poloka ya me;
ke tlaa boifa mang?
Jehofa ke thata ya botshelo jwa me,
ke tlaa nna mo poifong ka ga mang?
2E rile badira bosula ba nkwela
ba tla go ja nama ya me,
e bong baganetsi ba me
le baba ba me, ba kgopiwa ba wa.
3Le fa ntwa e ka tla ya thibelela
fa tlase ga me,
pelo ya me ga e ketla e boifa;
le fa tlhabano e ka tla ya ntsogela,
le gone moo ke tlaa nna boikanyo fela.
4Ke lopile selo sengwe mo go Jehofa,
ke sone se ke tlaa se senkang;
ke gore ke tle ke age
mo ntlong ya ga Jehofa
ka malatsi otlhe a botshelo jwa me,
go leba bontle jwa ga Jehofa
le go botsa mo tempeleng ya gagwe.
5Gonne e tlaa re mo motlheng
wa khuduego o tlaa mpoloka
ka go sa itsiweng
mo mogopeng wa gagwe;
o tlaa mphitlha mo sekhuting
sa motlaagana wa gagwe;
o tlaa ntsholetsa
a mpaya mo lefikeng.
6Mme jaana tlhogo ya me
e tlaa tsholediwa godimo ga baba
ba me ba ba mo tikologong ya me;
mme ke tlaa isa mo motlaaganeng
wa gagwe
ditshupelo tsa meduduetso;
ke tlaa opela,
ee, ke tlaa opelela Jehofa dipako.
7Jehofa, utlwa mogang ke goang
ka lentswe la me;
o bo o nkutlwele botlhoko,
mme o nkarabe.
8E rile fa o re:
“Batlang sefatlhogo sa me,”
pelo ya me ya go raya ya re:
“Sefatlhogo sa gago Jehofa,
ke tlaa se batla.”
9O se ka wa mphitlhela sefatlhogo
sa gago;
o se ka wa kgorometsa motlhanka
wa gago ka bogale;
wena o ntse o le thuso ya me;
o se ka wa ntatlha,
le gone o se ka wa ntlogela,
wena Modimo wa poloko ya me.
10Gonne rre le mme ba ntatlhile,
mme Jehofa o tlaa ntshola.
11Nthuta motlhala wa gago, Jehofa,
o ntsamaise mo tseleng e e bonalang,
ka ntlha ya baba ba me.
12O se ka wa nneela
mo go rateng ga baganetsi ba me;
gonne basupi ba maaka
ba ntsogologetse,
le ba ba budulang bopeloethata.
13Nkabo ne ne fano ke idibetse,
fa ke ne ke se ka ka dumela
fa ke tlaa bona molemo wa ga Jehofa
mo lefatsheng la batshedi.
14Lebelela mo go Jehofa;
o nne thata,
mme a pelo ya gago e natlafale;
ee, lebelela mo go Jehofa.
Who We AreWhat We EelieveWhat We Do
2025 by iamachristian.org,Inc All rights reserved.
