1E rile bosigo ke le mo bolaong
jwa me ka batla ene
yo mowa wa me o mo ratang;
ka mmatla,
mme ke se ka ka mmona.
2Ka re: “Jaana ke tlaa tsoga,
ke tlaa tsamayatsamaya mo motseng,
mo mebileng le mo ditseleng tsa
mheru, ke tlaa mmatla, ke batla
ene yo mowa wa me o mo ratang;”
ka mmatla,
mme ke se ka ka mmona.
3Balebedi ba ba tsamayatsamayang
mo motseng ba mphitlhetse;
ka ba raya ka re: “A lo bonye
ene yo mowa wa me o mo ratang?”
4Ya re ke ba fapaanya go le gonnye,
ka fitlhela ene yo mowa wa me
o mo ratang; ka mo tshegetsa,
ka gana go mo lesa, ga tsamaya
ka mo isa mo ntlong ya ga mme,
le mo ntlwaneng ya gagwe
yo o nkimileng.
5Lona bomorwadia Jerusalema,
ke a lo ikanisa ka ditshephe,
le ka dikwalata tsa naga,
go re lo se ka lwa tlhotlheletsa,
le fa e le go tsosa lorato,
go tle go tsamaye
go kgatlhege lona pele.
SEFELA SA BORAROSa Mosadi6E mang yo o tlhatlogang
a tswa kwa nageng jaaka
dithogomusi tsa mosi;
a nkgisitswe monate ka mura
le ka lebano,
le ka dikubuelo tsotlhe tsa morekisi.
7Bonang, ke sefata sa ga Solomone;
se dikanyeditswe ke banna ba ba
dinatla ba le masome a marataro,
e le banna ba ba dinatla ba Iseraele.
8Ba itse go kgatimokanya tšhaka
botlhe, ba rutegile mo ntweng;
mongwe le mongwe o beile tšhaka
ya gagwe ka fa seropeng
ka ntlha ya go boifa bosigo.
9Kgosi Solomone o ne a itirela kara
ya segosi ka dikgong tsa Lebanone.
10A dira maikaego a yone ka selefera,
mpa ya yone ka gouta,
manno a yone ka bohibidu
jo bo mokgona,
bogareng jwa sone go adilwe lorato
ke bomorwadia Jerusalema.
11Tswelang kwa ntle,
lona bomorwadia Sione,
lo bone kgosi Solomone
a na le serwalo sa tlhogo,
se mmaagwe o se mo rwesitseng
mo letsatsing la go tsaya ga gagwe,
mo letsatsing la boipelo jwa pelo
ya gagwe.
Who We AreWhat We EelieveWhat We Do
2025 by iamachristian.org,Inc All rights reserved.
