DIANE 19 - SetswanaTswana 1908/1992（TSW08NO）

1Mohumanegi yo o tsamayang mo go tlhokeng molato ga gagwe, o molemo bogolo go yo o lesoko mo dipounameng tsa gagwe, a bile a le seeleele.

2Gape, ga go molemo fa mowa o nna fela o tlhoka kitso; mme yo o fefosang dinao tsa gagwe o a leofa.

3Boeleele jwa motho bo tle bo theole tsela ya gagwe; mme pelo ya gagwe e tšararegele Jehofa.

4Khumo e tle e okeletse motho ditsala di le dintsi; mme mohumanegi a kgaoganngwe le tsala ya gagwe.

5Mosupi yo o tsietsang ga a ketla a tlhoka petso; le yo o bilolang maaka ga a ketla a falola.

6Batho ba bantsi ba tlaa rata go tlekeetsa motho yo o fang thata; le gone motho mongwe le mongwe ke tsala ya yo o abang dineo.

7Bana ba ga rraagwe mohumanegi botlhe ba a mo ila; bogolo jang ditsala tsa gagwe di mo katogela kgakala! A ba khueletsa ka mafoko, mme ba bo ba ile.

8Yo o bonang botlhale o ithata mowa; yo o bolokang tlhaloganyo o tlaa bona molemo.

9Mosupi yo o tsietsang ga a ketla a tlhoka petso, le yo o bilolang maaka o tlaa nyelela.

10Go tshela mo letlapung ga go a tshwanela seeleele; bogolo jang ga go a tshwanela motlhanka go busa dikgosana.

11Pharologanyo ya motho e mo dira gore a nne bonya go galefa; le gone ke kgalalelo ya gagwe go tlhokomologa tlolo.

12Botšarara jwa kgosi bo ntse jaaka go kgorotlha ga tau; mme botsalano jwa yone bo ntse jaaka monyo mo loremeng.

13Mosimane yo o seeleele ke tatlhego mo go rraagwe; le ditatalalo tsa mosadi wa motho ke go rotha mo go sa khutleng.

14Ntlo le dikhumo ke boswa jo bo tswang mo go borra batho; mme mosadi yo o bonokopela o tswa kwa go Jehofa.

15Bobodu bo digela motho mo thulamelong e kgolo, le gone motho yo o sa direng sepe o tlaa bolawa ke tlala.

16Yo o tshegetsang taolo o boloka mowa wa gagwe, mme yo o sa tlhokomeleng ditsela tsa gagwe o tlaa swa.

17Yo o tlhomogelang bahumanegi pelo o adima Jehofa, mme o tlaa ba a mo duelela tiro ya gagwe e e molemo.

18Otlhaya morwao ka gobo go na le tsholofelo, mme o se ka wa tlhoma pelo ya gago mo go mo senyeng.

19Motho yo o botšarara jo bogolo o tlaa rwala tefetso; gonne le fa o mo golola, o tlaa bo o na le go ba o dira jalo gape.

20Utlwa kgakololo, o tshole thuto, gore o tle o nne botlhale mo bokhutlong jwa gago.

21Go na le ditogamaano di le dintsi mo pelong ya monna; mme kgakololo ya ga Jehofa yone e tlaa ema.

22Keletso ya motho ke selekanyo sa bopelonomi jwa gagwe; mme mohumanegi o molemo bogolo go moaki.

23Go boifa Jehofa go isa botshelong, mme yo o nang nago o tlaa nna fela a kgotshe; ga a ketla a lekolwa ke bosula.

24Motho yo o bobodu o sotlhometsa letsogo la gagwe mo mogotšaneng, mme a gane le fa e le go ba a le busetsa mo ganong.

25Betsa mosotli, mme yo o sa tlhalefang o tlaa ithuta bonokopela; o kgalemele mongwe yo o nang le tlhaloganyo, mme o tlaa tlhaloganya kitso.

26Yo o thopang rraagwe ka thata, a ba a leleka mmaagwe, ke ngwana wa mosimane yo o tlhabisang ditlhong le yo o lereng kgobo.

27Khutla, morwaaka, go utlwa thuto, mme o tlaa ba o timelwa fela ke mafoko a kitso.

28Mosupi yo o seramatla o sotla ka katlholo; le molomo wa moikepi o metsa boikepo fela.

29Ditshekiso di baakanyeditswe basotli, le dithupa metlhana ya dieleele.