ISAIA 23 - SetswanaTswana 1908/1992（TSW08NO）

Polelelopele ka ga Ture le Sitone

1 Ponelopele ka ga Ture. Bokolelang lona dikepe tsa Tarešiše; gonne o kgakgabaditswe, go bile ga go na ntlo epe, ga go na fa go ka tsenwang teng; di go senoletswe di le kwa lefatsheng la Kitime.

2Didimalang, lona banni ba setlhake, wena yo barekisi ba ba tswang Sitone ba kgabaganya lewatle ba go etleetleditseng.

3Mme a le mo metsing a magolo mabele a peo ya Shihore, thobo ya noka ya Nile e ne e le one a o ipapalelang ka one; mme a bo a le borakanelo jwa merafe.

4Tlhajwa ke ditlhong wena Sitone, gonne lewatle, le buile, felo ga bothata ga lewatle, la re: “Ga ke a nna mo pelegong, le gone ga ke a tshola, le fa e le go otla makau, le fa e le go godisa barweetsana.”

5E tlaa re kutlwalelo e fitlha kwa Egepeto, ba utlwe botlhoko thata ka ga kutlwalelo ya Ture.

6Tlolaganyetsang kwa Tarešiše lo bokolele, lona banni ba setlhake.

7A ke one motse wa lona ne, o o ntseng wa ipela, o o saleng ka o theiwa ka metlha ya bogologolo tala, o dinao tsa one di o isitseng kwa kgakala thata, gore o tlholatlhole teng?

8E mang yo o ikaeletseng se ka ga Ture, motse wa serwalo, o barekisi ba one e leng dikgosana, o babapadi ba one e leng batlotlegi ba lefatshe?

9Jehofa wa masomosomo o se ikaeletse, go mara boikgodiso jwa kgalalelo yotlhe, gore a tsenye batlotlegi botlhe ba lefatshe lonyatso.

10Penologela lefatshe la gago jaaka Nile, wena morwadia Tarešiše; ga go tlhole go na le moitlamo tikologong ya gago.

11O otlololetse lewatle letsogo la gagwe, o reketlisitse magosi; Jehofa o laotse ka ga Kanana, gore go senngwe mafelo a lone a a thata.

12Mme o rile: “Ga o ketla o tlhola o itumela wena kgarebana yo o patikwang, morwadia Sitone; tloga o eme o tlolaganyetse kwa Kitime; le gone ga o ketla o bona boitapoloso teng.”

13Bonang, lefatshe la Bakalatea; tšhaba e, ga e tlhole e le teng; Moasiria o le laoletse gore le nne la dibatana tsa naga; ba ne ba emisa dikago tsa bone tsa phemelo, ba ribegetsa matlo a lone a dikgosi; ba le dira marope fela.

14Bokolelang lona dikepe tsa Tarešiše; gonne felo ga lona fa go thata go kgakgabaditswe.

15Go tlaa dirala mo letsatsing leo, go re, Ture o tlaa lebalwa ka dinyaga di le 70, ka fa malatsing a kgosi e le nngwe; mme morago ga bokhutlo jwa dinyaga di le 70, ka ga Ture go tlaa nna jaaka mo sefeleng sa seaka.

16Tsaya harepe, o tsamayetsamaye le motse, wena seaka, yo o ntseng o lebetswe; o koteketse sentle, o opele dipina di le dintsi, gore o tle o gakologelwe.

17Mme go tlaa dirala morago ga bokhutlo jwa dinyaga di le 70, go re, Jehofa o tlaa lekola Ture, mme mosadi yo o tlaa boela kwa go thapelweng ga gagwe ka tuelo, mme o tlaa dira boaka le magosi otlhe a lefatshe mo lefatsheng lotlhe fela.

18Mme tlhwatlhwa ya one, le go thapelwa ga one ka tuelo, go tlaa nna boitshepelo Jehofa; ga go ketla go putukelelwa le fa e le go bewa le mahumo; gonne tlhwatlhwa ya one e tlaa nna ya ba ba agileng fa pele ga Jehofa, gore ba je ba kgore, le go bona diaparo tse di nnang ka lobaka.