1“Ke ne ka dira kgolagano
le matlho a me, jalo
ke ne ke ka leba mosetsana jang?
2Gonne kabo ya Modimo
e e tswang godimong ke eng,
le se Mothatayotlhe
o se abang boswa
jo bo tswang bogodimong ke eng?
3A ga se tatlhego ya basiamolodi,
le go ya setime ga badiri
ba boikepo?
4A ga a bone ditsela tsa me,
a ba a bala dikgato tsotlhe tsa me?
5“Fa ke sepetse ka boithamako,
fa lonao lwa me lo akofetse
mo tsietsong;
6(a ke lekanngwe mo selekanyong
sa pego se se lekalekanyeng,
gore Modimo o tlo o itse
thokgamo ya me);
7fa kgato ya me e fapogile tsela,
fa pelo ya me e setse matlho a me
morago,
fa setshubaba sengwe se ngaparetse
diatla tsa me,
8foo a ke jale, mme go je o sele;
ee, a ditotafalo tsa tshimo ya me
di mumulwe.
9“Fa pelo ya me e kile ya fepisiwa
ke mosadi,
fa ke laletse fa kgorong
ya wa gaetsho;
10foo a mosadi wa me a silele o sele,
mme ba bangwe ba obame
mo go ene.
11Gonne moo e ne e tlaa nna
mathamo;
ee, e tlaa nna boikepo
jwa go bediwa ke baatlhodi;
12gonne ke molelo o o lailelang kwa
Tshenyegong,
e le o o neng o tlaa mumula
totafalelo ya me yotlhe fela.
13“Fa e rile motlhanka wa me,
le fa e le lelata la me,
ba ganela le nna
ka nyatsa mafoko a bone;
14foo ke tlaa dirang
mogang Modimo o nanogang?
Mogang o sekisang
ke tlaa o fetola ke reng?
15Yo o ntirileng mo sebopelong
a ga a a mo dira le ene?
A ga re a bopiwa roo babedi
ke a le mongwe fela mo sebopelong?
16“Fa ke ganne ka sengwe
se mohumanegi o ne a se eletsa,
kgotsa ka tlhaedisa matlho
a mosadi wa motlholagadi;
17kgotsa fa ke jele thathanyana ya me
ke le nosi,
mme lesiela le se ka la ja ga yone;
18(nnyaa, e sa le ka bokau jwa me,
le ntse le gola fela le nna,
jaaka ke ka bo ke le rraalo;
ene ke sa le ke nna mogogi
wa gagwe
go tswa sebopelong sa ga mme);
19fa ke bonye mongwe a swa
ka go tlhoka diaparo,
kgotsa motlhoki a se na kobo;
20fa ditheka tsa gagwe
di se ka tsa ntshegofatsa,
fa a se ka a thuthafadiwa
ka bobowa jwa dinku tsa me;
21fa ke tsholeleditse lesiela
letsogo la me go le senya,
ka gobo ke bona thuso ya me
kwa kgotleng,
22foo a lerudi la me
le we mo legetleng,
letsogo la me
le komolwe mo lesapong.
23Gonne tatlhego e e tswang
mo Modimong
e ne e le theregiso mo go nna
mme ka ntlha ya tlotlomalo ya one
ke ne ke sa nonofa go dira sepe.
24“Fa ke dirile gouta tsholofelo ya
me, mme
ka raya gouta e e itshekileng ka re:
‘O boikanyo jwa me;’
25fa ke itumetse
ka gobo khumo ya me e le kgolo,
le ka gobo seatla sa me
se bapetse thata;
26fa ke lebile letsatsi ka le phatsima,
kgotsa kgwedi ka e tsamaya
mo bophatsimong;
27fa pelo ya me e fepisiwa
ka bosaitsiweng,
le molomo wa me
wa atla seatla sa me,
28moo le gone
e ne e tlaa nna boikepo
jwa go bediwa ke baatlhodi;
gonne ke tlaa bo ke akeditse
Modimo o o kwa godimo.
29“Fa ke itumeletse tshenyego
ya yo o nkilang,
kgotsa ka ikgoletsa kwa godimo
fa bosula bo mo tshwere;
30(ee, ga ke a ka ka leseletsa molomo
wa me go leofa
ka go lopa ka phutso gore a swe);
31fa batho ba mogope wa me
ba se ka ba re:
‘E mang yo o ka bonang mongwe
yo o sa kgorang dijo tsa gagwe?’
32Moeng ga a ka a lala mo mmileng,
mme ka bulela motsamai
ditswalo tsa me;
33fa ke editse Atame
ka bipa ditlolo tsa me,
ka loba boikepo jwa me
mo sehubeng sa me,
34ka gobo ke ne ke boifa bontsi
jo bogolo,
fa lonyatso lwa ba makgotla
lo lwa ntheregisa
ka ba ka tla ka didimala,
ke se ka ka tswela kwa ntle ga ntlo;
35a bo ke ka bo ke na le mongwe
yo o nkutlwang!
(Bona, go ikwala ga me ke mo,
a Mothatayotlhe a mphetole);
mme ka nna le lokwalo lo lo
mpayang molato,
lo moganetsi wa me o lo kwadileng!
36Ruri ke ne ke tlaa lo sikara
mo leruding la me;
ke ne ke tlaa lo bofelela mo go nna
jaaka serwalo sa tlhogo.
37Ke ne ke tlaa mo kakanyetsa
palo ya dikgato tsa me,
ke ne ke tlaa mo atamela
jaaka kgosana.
38Fa lefatshe la me le goa
ka ga me,
le meralo ya lone e lela mmogo;
39fa ke jele maungo a lone
e seng ka madi, kgotsa ke gonotse
mowa wa beng ba lone,
40a sitlasitlwane e tlhoge
mo boemong jwa mabele le mofero
mo boemong jwa mmidi.”
Mafoko a ga Jobe a fedile.
Who We AreWhat We EelieveWhat We Do
2025 by iamachristian.org,Inc All rights reserved.
