1Foo ga fetola Elifase wa Motemana, a re:
2“A monna yo o botlhale
o tshwanetse go fetola
ka kitso ya boithamako,
a kgorisa mpa ya gagwe
ka phefo ya botlhabatsatsi?
3A go tshwanetse fa a ka tsaya kgang
ka puo e e se nang thuso,
kgotsa ka dipolelo
tse o sa kakeng a dira molemo ope
ka tsone?
4Ee, o tsupuetsa poifo,
mme o ngotla tshisimogo
fa pele ga Modimo.
5Gonne boikepo jwa gago
bo ruta molomo wa gago,
mme o itshenkela loleme
lwa maferefere.
6Molomo wa gago tota o a go sekisa,
e seng nna;
ee, dipounama tsa gago
di supa ka ga gago di go nyatsa.
7“A ke wena monna wa ntlha
yo o tsetsweng?
Kgotsa a o tsetswe pele
ga dithabana?
8A o utlwile kgakololo
e e sa itsiweng ya Modimo?
A o ikganelela botlhale?
9O itse eng se rona re sa se itseng?
O tlhaloganya eng
se se seng mo go rona?
10Ba ba ditlhogo ditshweu
le banna ba ba tsofetseng thata
re na nabo,
ba ba tsofetseng thata
bogolo go rraago.
11A dikgomotso tsa Modimo
di dipotlana bobe mo go wena,
le lefoko le le buang nao ka bonolo?
12Ana pelo ya gago
e go isetsang kwa kgakala,
le matlho a gago a gwetlhelang?
13Fa e bo ne ne o sokolola mowa
wa gago go tlhabana le Modimo,
o lesa mafoko a a ntseng jalo
a tswa mo molomong wa gago?
14 Ana motho e be e le eng,
fa e bo ne ne go twe,
o ka nna montle,
le yo o tsetsweng ke mosadi,
fa e bo ne ne go twe,
o ka nna tshiamo?
15Bona, ga o ikanye baitshepi ba one;
ee, le magodimo ga a mantle
mo ponong ya one.
16Bogolo jang go sa kake ga nna jalo
motho yo o makgapha,
yo o bodileng, e le monna
yo o nwang boikepo jaaka metsi!
17“Nkutlwa, ke tlaa go kaela;
se ke se bonyeng ke tlaa se bolela:
18(Se banna ba ba botlhale
ba se boletseng
se tswa mo go borraabo,
mme ba se ka ba se loba;
19ba lefatshe le neilweng bone
ba le bosi,
mme go se ka ga fetela moeng ope
mo go bone:)
20Moikepi o inganga mo botlhokong
ka metlha yotlhe ya gagwe,
mme dinyaga tse di badilweng
di beetswe mopatiki.
21Modumo wa ditheregiso
o mo ditsebeng tsa gagwe;
le a le mo tlhogonolong
mothopi o tlaa mo wela.
22Ga a dumele fa a tlaa boa
a tswa mo lefifing,
a lebeletswe ke tšhaka.
23O kgarakgatshegela dijo, a re:
‘Di kae?’ O a itse fa letsatsi la lefifi
le etleetsegile, le le fa go ene:
24Pitlagano le tlalelo e e mahehe
di a mmoifisa;
di a mo fenya jaaka kgosi
e e iketleeditseng go tlhabana;
25gonne o otlololetse Modimo letsogo
go tlhabana nao,
o inatlafaletsa Mothatayotlhe.
26O a o sotlhomelela ka thamo
e e thata le ka dikgogoropo
tsa dithebe tsa gagwe;
27gonne o ikhurumeditse sefatlhogo
ka monono wa gagwe;
mme a dire makukunopo
a mahura mo dithekeng tsa gagwe.
28O ntse a agile mo metseng
e e swafetseng, mo matlong
a a sa nnweng ke ope,
a a ne a iketleeditse
go nna mekoa ya go wa fela.
29Ga a ketla a huma,
le dithoto tsa gagwe
ga di ketla di tlhomama,
le gone go ungwa ga tsone
ga go ketla go inamela fa fatshe.
30Ga a ketla a tswa mo lefifing;
kgabo ya molelo
e tlaa omeletsa dikala tsa gagwe,
mme o tlaa tsamaela koo ka pudulo
ya molomo wa one.
31A a se ikanye boithamako a itsietsa,
gonne boithamako e tlaa nna maduo
a gagwe.
32Go tlaa mo dirafalela
pele ga motlha wa gagwe,
kala ya gagwe
ga e ketla e nna nana.
33O tlaa udubatsega
dikungwa tsa gagwe
tse di sa butswang jaaka mofine,
o tlaa tlhotlhorega sethunya
sa gagwe jaaka motlhware.
34Gonne lesomo la ba ba sa reng
Modimo sepe le tlaa nna boopa,
molelo o tlaa laila megope
ya ba ba neo e e faposang tshiamo.
35Ba ithwala bosenyi,
ba tsala boikepo,
mpa ya bone e baakanya tsietso.”
Who We AreWhat We EelieveWhat We Do
2025 by iamachristian.org,Inc All rights reserved.
