1Ruri Modimo o molemo
go Iseraele, e bong
go ba ba itshekileng mo pelong.
2Ka ga me,
dinao tsa me di batlile go ya,
dikgato tsa me tsa batla go relela.
3Gonne e rile ke bona
letlhogonolo la baitelaganyi
ka nna pelotshetlha
ka ga bone baikepi.
4Gonne ga go na dipitlagano
mo losong lwa bone;
mme thata ya bone e nitame fela.
5Ga ba mo tlalelong
jaaka batho ba bangwe;
le gone ga ba tshwenyege
jaaka batho ba bangwe.
6Ke gone ka mo
boikgodiso bo ba rarileng
jaaka dibaga mo thamong;
go thubaka go ba apesitse
jaaka kobo.
7Matlho a bone
a rotologile ka monono;
ba na le mo go fetang
keletso ya pelo.
8Ba a sotla mme ba bue patiko
ba le mo bosuleng;
ba bue ka boikgantsho.
9Ba nyunyubetsa magodimo;
loleme lwa bone lo ralale lefatshe.
10Ke gone ka moo batho ba ga gabo
ba tleng ba boele fa;
mme metsi a senwelo se se tletseng
a gopiwe ke bone.
11Mme ba re:
“Modimo o itse jang?
A go na le kitso
mo go Mogodimodimo?”
12Bona, bao ke bone baikepi;
e re ka ba ntse ba le mo boiketlong
ka metlha yotlhe,
boo ba totelwa ke dikhumo.
13Ruri ke ntlafaleditse pelo ya me
lefela,
ka ba ka tlhapa diatla tsa me
mo go se nang molato;
14gonne ke ntse ke tshwenyega
ka letsatsi lotlhe,
ka otlhaiwa ka meso yotlhe.
15Fa nkabo ke rile:
“Ke tlaa bua jalo;”
bona, nka bo ke diretse bana ba
losika lwa gago ka boferefere.
16E rile ke akanya gore
goo mo nka go itse jang,
ga nna tapiso e e botlhoko
mo go nna;
17ka tla ka tsamaya ka tsena
mo felong ga boitshepo ga Modimo,
mme ka akanya bofelelo
jwa bone.
18Ruri o ba baya mo mareleding;
o ba digela mo tshenyegong.
19Ana ba kile ba senyega jang
ka ponyo ya leitlho fela!
Ba jegetse ruri ka ditherego.
20Jaaka toro fa motho a kubuga;
le wena Morena, fa o kubuga,
o tlaa nyatsa setshwano sa bone jalo.
21Gonne pelo ya me
e ne e le botlhoko,
mme ka tlhajwatlhajwa
mo diphilong tsa me;
22ka bo ke le popego ya sefolofolo fela
mo go ntseng jaana, ke se na kitso;
ka nna jaaka phologolo fela
fa pele ga gago.
23Le fa go ntse jalo
ke ntse ke na nao ka metlha yotlhe;
o ntse o tshwere seatla sa me
se segolo.
24O tlaa nketelela pele
ka kgakololo ya gago,
morago o tlaa nkamogela
mo kgalalelong.
25Ke na le mang kwa legodimong
fa e se wena?
Le mo lefatsheng ga go na ope
yo ke mo eletsang fa e se wena.
26Nama ya me e a fela, le pelo ya me;
Modimo ke thata ya pelo ya me,
le kabelo ya me ka bosakhutleng.
27Gonne, bona ba ba leng kgakala nao
ba tlaa nyelela;
o sentse botlhe ba ba go tlogelang
ba ya boakeng.
28Mo go nna go molemo
go atamela Modimo;
ke dirile Morena Modimo
botshabelo jwa me,
gore ke tle ke bolele
ka ga ditiro tsa gago
tsotlhe fela.
Who We AreWhat We EelieveWhat We Do
2025 by iamachristian.org,Inc All rights reserved.
