1“Le fa go ntse jalo wena Jobe,
ke a go rapela,
utlwa puo ya me,
o reetse mafoko a me otlhe.
2Bona jaana, ke tumolotse molomo
wa me, loleme lwa me
lo buile mo ganong la me.
3Mantswe a me a tlaa kakanya
thokgamo ya pelo ya me;
se dipounama tsa me di se itseng
di tlaa se bua ka bophepa.
4Mowa wa Modimo o ntirile,
go budula ga Mothatayotlhe
go a ntshedisa.
5Fa o nonofile, o tle o mphetole;
o rulaganye mafoko a gago;
ema fa pele ga me!
6Bona, nna ke ntlheng ya Modimo,
fela jaaka wena;
le nna ke bopilwe ka letsopa.
7Bona, theregiso ya me
ga e ketla e go boifisa,
le gone ga o ketla o imelesega
ka kgatelelo ya me.
8“Ruri o buile mo kutlong ya me,
ke utlwile lentswe la mafoko a gago,
wa re:
9‘Ke itshekile, ke se na tlolo;
ke phepa fela, le gone
ga go na boikepo mo go nna.
10Bona, o bona dikgopi mo go nna,
o nkaya go re ke mmaba wa one;
11 o tsenya dinao tsa me mo disaneng,
o tlhokometse ditselana tsotlhe
tsa me.’
12Bona, ke tlaa go fetola mo go se,
ga o a siama;
gonne Modimo o mogolo
bogolo go motho.
13Ana o ganelelang le one,
gonne ga o ke o ipolelela mo dilong
dipe tsa one?
14Gonne Modimo o bua gangwe fela,
ee gabedi,
le fa motho a sa go tlhokomele.
15 E re mo torong,
mo ponatshegelong ya bosigo,
fa thulamelo e kgolo e wela batho
mo borokong mo bolaong;
16foo o kabolole batho ditsebe,
o kanele thuto mo go tsone.
17Gore o tlose motho
mo boikaelelong jwa gagwe,
le go subela motho boikgodiso;
18o thiba mowa wa gagwe,
gore o se ye mo moleteng,
le botshelo jwa gagwe
gore a se swe ka tšhaka.
19Le gone o otlhaiwa ka bolwetse
mo bolaong jwa gagwe,
le ka tlhatlharo e e sa khutleng
mo marapong a gagwe;
20jalo botshelo jwa gagwe boo
bo tle bo tenwe ke dijo,
le mowa wa gagwe
ke dijo tse di metsegang.
21Nama ya gagwe e tlhorege,
ga e kake ya bonwa;
marapo a gagwe
a a neng a sa bonwe
a bile a tswetse kwa ntle.
22Ee, mowa wa gagwe o atamela
kwa moleteng,
le botshelo jwa gagwe
kwa disenying.
23Fa go na le moengele mongwe nae,
e le mophutholodi, e le motho a le
mongwe fela mo go ba ba sekete,
gore a kaele motho
se se mo siametseng;
24foo o nna pelotshweu kwa go ene,
mme o re: ‘Mo golole,
gore a se ka a fologela mo moleteng,
ke bonye thekololo.’
25Nama ya gagwe e tlaa šafala
bogolo go ya ngwanyana,
o tlaa boela mo malatsing
a bokau jwa gagwe.
26A rapele Modimo,
mme o nne pelotshweu kwa go ene;
a ba a tle a bone
sefatlhogo sa one ka boitumelo;
o rebolele motho tshiamo ya
gagwe.
27A opele fa pele ga batho, a re:
‘Ke leofile,
ka sokamisa sone se se siameng,
mme go se ka ga nthusa sepe.
28O rekolotse mowa wa me
gore o se ye mo moleteng,
botshelo jwa me
bo tlaa bona lesedi.’
29Bona, dilo tsotlhe tse Modimo o a
di dira, o di direla motho gabedi,
ee, gararo.
30Go busa mowa wa gagwe
mo moleteng, gore a sedifadiwe
ka lesedi la batshedi.
31Jobe, o tlhokomele thata,
o ntheetse;
didimala mme ke tlaa bua.
32Fa o na le sengwe se o se buang
o mphetole;
bua, gonne ke rata go go siamisa.
33Fa go sa nna jalo, o reetse nna;
didimala,
mme ke tlaa go ruta botlhale.”
Who We AreWhat We EelieveWhat We Do
2025 by iamachristian.org,Inc All rights reserved.
