DIANE 18 - SetswanaTswana 1908/1992（TSW08NO）

1Yo o itomololang o batla keletso ya gagwe ka esi, mme a šakgalele botlhale jotlhe jo bo itekanetseng.

2Seeleele ga se na kgatlhego mo tlhaloganyong, fa e se gore pelo ya sone e tle e itshenole fela.

3Motlhang moikepi o tlang, foo go tle le lone lonyatso, le botlhabisa ditlhong bo tle le kgobo.

4Mafoko a molomo wa monna a ntse jaaka metsi a a boteng, motswedi wa botlhale o ntse jaaka nokana e e elelang.

5Ga go molemo go gobela sebele sa moikepi, le fa e le go faposa mosiami mo katlholong.

6Dipounama tsa seeleele di tsena mo kgannyeng le molomo wa sone o ipiletsa dithupa.

7Molomo wa seeleele ke tshenyego ya sone, le dipounama tsa sone ke seru sa mowa wa sone.

8Mafoko a mosebi a ntse jaaka dijo tse di akolwang, mme a fologele kwa tengteng ga mpa.

9Le ene yo o bolealea mo tirong, ke ngwana wa ga rraagwe mosenyi.

10Leina la ga Jehofa ke kago e e godileng e e thata, mosiami o sianela mo go yone, mme a bolokege.

11Khumo ya mohumi ke yone motse wa gagwe o o thata, e bile ke lorako lo lo godileng mo kgopolong ya gagwe.

12E tle e re pele ga tshenyego pelo ya motho e ipege, mme boikokobetso bo etelele tlotlego pele.

13Yo o fetolang a ise a utlwe, ke boeleele le ditlhong mo go ene.

14Pelo ya monna e tle e mo itshokisetse seemera sa gagwe; mme mowa o o phatlogileng o ka kakatlololwa e mang?

15Pelo ya yo o senokopela e bapala kitso, le tsebe ya yo o tlhalefileng e batla kitso.

16Neo ya motho e tle e mo fenosetse bonno, mme e mo ise fa pele ga batho ba bagolo.

17Yo o ipuelelang pele o ntse jaaka ekete o siame, mme wa ga gabo a tle a mo kheleisetse ruri.

18Bola bo tle bo khutlise dikgang, bo bo bo kgaoganye bathata.

19Ngwana wa rra motho fa a kgopilwe o ba a le thata go fenngwa bogolo go motse o o thata, mme dikgang tse di ntseng jalo di ntse jaaka mephakalego ya kago e e dithako di thata.

20Mpa ya motho e tlaa tladiwa ka loungo lwa molomo wa gagwe; o tlaa kgorisiwa ka totafalo ya dipounama tsa gagwe.

21Loso le botshelo di mo thateng ya loleme, ba ba lo ratang ba tlaa ja loungo lwa lone.

22Yo o tsayang mosadi, o bona se se molemo, o ba a bona botsalano mo go Jehofa.

23Mohumanegi o tle a bue ka dithapelo, mme mohumi ene o fetola ka bopelompe.

24Yo o itirelang ditsala di le dintsi, o itirela go itshenya, mme go na le tsala e e kgomarelang motho bogolo go ngwana wa ga rraagwe.