GENESISE 28 - SetswanaTswana 1908/1992（TSW08NO）

1Isake a bitse Jakobe, a mo segofatsa, a mo laya a re: “O se ka wa tsaya mosadi wa bomorwadia Kanana.

2Nanoga o ye kwa Patanaarame, kwa ntlong ya ga Bethuele rra mmaago; o tseye mosadi gone wa bomorwadia Labane, kgaitsadia mmaago.

3A Modimo Mothatayotlhe o go segofatse, o go atise, o go ntsifatse gore o tle o nne lesomo la ditšhaba.

4 O go neye lesego la ga Aberahame le losika lwa gago nao; gore o tle o rue lefatshe la majako a gago, le Modimo o le neileng Aberahame.”

5Isake a naya Jakobe tsela a ya Patanaarame, kwa go Labane morwa Bethuele wa Mosiria, kgaitsadia Rebeka, mma Jakobe le Esau.

Esau o nyala mosadi yo mongwe

6Jaana Esau a bona fa Isake a segofaditse Jakobe, a bile a mo neile tsela go ya Patanaarame gore a tseye mosadi gone, le jaaka a re a mo segofatsa a mo laya, a re: “O se ka wa tsaya mosadi wa bomorwadia Kanana;”

7le gone fa Jakobe a utlwile rraagwe le mmaagwe a ile Patanaarame.

8Esau a ba a bona fa bomorwadia Kanana ba sa kgatlhe rraagwe Isake.

9Foo Esau a ya kwa go Išemaele, a oketsa basadi ba a nang nabo ka go tsaya Mahalathe morwadia Išemaele, morwa Aberahame, kgaitsadia Nebaiothe, go nna mosadi wa gagwe.

Toro ya ga Jakobe kwa Bethele

10Jakobe a tswa mo Beerešeba, a leba kwa Harane.

11A wela felo gongwe, a lala gone, ka gobo letsatsi le ne le phirimile. A tsaya lentswe lengwe la felo foo a le sama, a robala.

12 A lora, mme bonang, ga bo go tlhomilwe sepalamo fa fatshe, setlhoa sa sone se fitlha kwa legodimong; mme bonang; ga bo go tlhatloga go bo go fologa baengele ba Modimo ka sone.

13 Mme bonang, Jehofa a bo a eme fa godimo ga sone a re: “Ke nna Jehofa Modimo wa ga Aberahame rraago, le Modimo wa ga Isake. Lefatshe le o letseng mo go lone ke tlaa le naya wena, le losika lwa gago.

14 Losika lwa gago lo tlaa nna jaaka lorole lwa lefatshe, o tlaa anamela kwa bophirimatsatsi, le kwa botlhabatsatsi, le kwa botsheka, le kwa borwa; mo go wena le mo losikeng lwa gago ditshika tsotlhe tsa lefatshe di tlaa segofala.

15Bona, ke na nao, ke tlaa go boloka kwa le kwa o yang gone, ke ba ke go lere gape mo lefatsheng le; gonne ga nketla ke go tlogela go tle go tsamaye ke dire se ke se buileng nao.”

16Jakobe a thanya mo borokong jwa gagwe a re: “A bo Jehofa a le felong fano! mme ke ne ke sa itse.”

17A boifa a re: “Kana felo fano go boitshega jang! Ga se gope go sele fa e se ntlo ya Modimo fela; fano ke mojako wa legodimo.”

18Jakobe a phakela ka moso a tsaya lentswe le o letseng a le samile a le tlhoma go nna segopotso, a ba a thela lookwane mo godimo ga lone.

19Mme a raya leina la felo foo a re: “Bethele,” mme leina la motse gale go ne go twe Luse.

20Jakobe a itlama ka maikano a re: “E tlaa re fa Modimo o nna le nna, fa o mpoloka mo tseleng e ke e tsamayang, o nnaya dijo go ja le diaparo go apara,

21gore ke be ke boele ntlong ya ga rre ka kagiso, foo Jehofa o tlaa nna Modimo wa me.

22Lentswe le ke le tlhomileng motloutlo le tlaa nna ntlo ya Modimo; mo go tsotlhe tse o tlaa di nnayang, ruri ke tlaa go naya sa bosome.”