啟示錄 22 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1天使又俾𠊎看生命水个河壩，像水晶恁明亮，對上帝㧯羔羊个寶座流出來，

2通過城中央个街路。河壩兩片有生命樹，逐年結果子十二擺 ，逐隻月一擺；樹葉係為到醫治萬民。

3城內毋會再有上帝所咒詛个事情。

上帝㧯羔羊个寶座愛在這座城底背；佢个僕人全部愛敬拜佢。

4佢等會見到上帝个面，佢个名愛寫在佢等个額頭。

5在該位毋會再有暗晡頭；佢等無需要燈抑係日頭个光，因為主上帝會照明佢等。佢等愛做王，直到永永遠遠。

耶穌个降臨

6天使又對𠊎講：「這兜話係真實可靠个。主，就係使眾先知得到靈感个上帝，已經差派佢个使者，將即時就愛發生个事情指示佢个眾僕人。」

7耶穌講：「看啊，𠊎盡遽就會到了！遵守這本書底背所預言个有福氣了！」

8𠊎 — 約翰聽到又看到這一切事情。𠊎聽到又看到以後，就伏在指示𠊎這兜事情个天使腳前愛拜佢。

9總係佢對𠊎講：「千萬做毋得！𠊎㧯你、你該兜做先知个兄弟、並所有遵行這本書个話个，全部共樣係僕人。你應當敬拜上帝！」

10佢又對𠊎講：「莫將這本書底背所預言个話封起來，因為這一切事情實現个時機會到了。

11作惡个由在佢繼續作惡；屙糟个由在佢屙糟。行善个由在佢繼續行善；聖潔个由在佢聖潔。」

12耶穌講：「看啊，𠊎盡遽就會到了！賞罰在𠊎，𠊎愛照逐儕个行為報應佢。

13𠊎係阿爾法㧯亞米茄，係最先㧯最後个，係開始㧯結束。」

14洗淨自家衫褲个人實在有福氣；佢等會有權到生命樹該位，又做得對門入城。

15總係該兜畜牲、行邪術个、淫亂个、㓾人个、拜偶像个、並一切歡喜行虛假个人，全部愛留在城外。

16「𠊎 — 耶穌差遣𠊎个天使，去各教會對你等證明這兜事。𠊎係大衛家族个後代；𠊎係光明个天光星。」

17聖靈㧯新娘對耶穌講：「來！」

所有聽到个人也應該講：「來！」

來啊，嘴燥个人全部愛來；

想愛个人全部做得白白得到生命个水。

結論

18𠊎 — 約翰嚴嚴警告每一個聽到這本書所預言个人：若有人在這兜話以外又加添麼介，上帝會將這本書底背所寫个災難加給佢；

19若有人對這本書底背个預言除掉一點，上帝會將佢除名，使佢無資格好享受這本書所記載个生命樹㧯聖城个福氣。

20為這一切做見證个，佢講：「著！𠊎就會到了！」

阿愐！主耶穌啊，請你來！

21願主耶穌个恩典㧯每一個人 同在。阿愐！