歷代志上 13 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

約櫃對基列‧耶琳被人運走(撒母耳記下 6:1-11)

1 大衛㧯所有帶領千人軍隊㧯百人軍隊該兜軍官參詳，

2然後向全以色列人民宣告講：「若係你等同意，又這係出於上主 — 𠊎等上帝个旨意，𠊎等就來派人去全以色列，㧯其他同胞還有住在逐城个祭司㧯利未人講，請佢等全部集合到𠊎等這位來。

3然後，𠊎等將上帝个約櫃請轉來，因為掃羅做王个時𠊎等全無在約櫃面前求問上帝。」

4人民感覺這建議當好，全部同意恁樣做。

5所以，大衛召集全國个以色列人，對南片个埃及邊界直到北片个哈馬隘口逐地區个人全部來，為到愛對基列‧耶琳將上帝个約櫃徙到耶路撒冷。

6大衛㧯以色列人民到猶大境內个巴拉城 (就係基列‧耶琳) 愛對該位請上帝个約櫃過來；這約櫃个名係照該坐在基路伯頂个上主个名安个。

7佢等將上帝个約櫃放在一輛新車頂，對亞比拿達个屋下運出來，烏撒㧯亞希約負責駛車。

8大衛㧯所有以色列人攏總放勢 跳舞，頌讚上帝。佢等唱歌，並彈奏各種樂器，有豎琴、七弦琴、鈴鼓、鑇仔㧯喇叭。

9佢等來到基頓个打麥場，該時拉車仔个牛逕倒，險險跪落去，烏撒就伸手扶等約櫃。

10上主就向佢發譴，擊打佢，因為佢摸到約櫃。烏撒就死在上帝个面前；

11所以該地方就喊做比列斯‧烏撒

，直到今晡日。因為上主向烏撒發譴，處罰佢，大衛心肚當無歡喜。

12該日，大衛嚇倒，盡驚上帝，就講：「𠊎這下樣敢將上帝个約櫃請過來呢？」

13所以，大衛無將約櫃運入大衛个城，反轉對別條路將約櫃運到迦特人俄別‧以東个屋下。

14上帝个約櫃在該位停留三個月；上主賜福給俄別‧以東个全家，㧯所有屬佢个一切。