路加 19 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶穌㧯撒該

1耶穌入去耶利哥城，愛對該位經過。

2該位有一個稅務長，名安到撒該，係一個盡有錢个人。

3撒該盡想愛看耶穌係樣般个人，總係佢身材矮細，在人群中看毋到耶穌。

4為到愛看耶穌，佢就走到大家个頭前去，爬上一頭桑樹；因為耶穌會對該條路經過。

5耶穌行到該位，昂頭看撒該，對佢講：「撒該，遽遽下來！今晡日𠊎一定愛住在若屋下。」

6 撒該就遽遽下來，歡歡喜喜接待耶穌。

7眾人看到，就緊唸講：「佢樣做得入罪人个屋下做人客！」

8 撒該企等對主講：「主啊，𠊎將𠊎个財產分一半給窮苦人；𠊎若識敲麼人个油，𠊎就賠佢四倍。」

9耶穌對佢講：「今晡日救恩臨到這家了，因為這個人共樣也係亞伯拉罕个子孫。

10人子來，係愛尋迷失个人，來救佢。」

僕人㧯銀幣个比喻(馬太 25:14-30)

11大家緊聽這兜話，耶穌又對佢等講另外一個比喻。這時，耶穌已經會到耶路撒冷，大家恅到上帝个國黏時就會出現了。

12所以，耶穌講：「有一個貴族愛去遠方，接受封立做王，然後正倒轉來。

13出外以前，佢喊十個僕人來，逐儕給一隻銀幣 ，對佢等講：『𠊎無在个時，你等拿這個錢去做生理。』

14佢本國个人一直怨恨佢，就派使者跈在佢个後尾，講：『𠊎等無愛這個人做𠊎等个王。』

15「該貴族接受封立做王轉來以後，即時吩咐人喊該兜領銀幣个僕人來佢个面前，愛知佢等逐儕做生理賺幾多。

16頭一個來講：『主人，𠊎用你給𠊎个銀幣賺到十隻銀幣。』

17主人講：『盡好！你係一個好僕人；你既然在細細个事項忠心，𠊎愛委派你管理十座城。』

18第二個僕人來講：『主人，𠊎用你給𠊎个銀幣賺到五隻銀幣。』

19主人講：『你也愛管五座城。』

20「又有一個僕人來講：『主人，你个銀幣在這位；𠊎用手帕將它包到好好。

21𠊎一直驚你，因為你係一個厲害个人：無放个，你也愛收；無種个，你也愛割。』

22主人對佢講：『你這個壞僕人啊！𠊎愛用你自家个話來定你个罪！你既然知𠊎係一個厲害个人：無放个，𠊎也愛收；無種个，𠊎也愛割。

23恁樣，你做麼介毋將𠊎个錢放在銀行，等𠊎轉來个時，做得連本帶利收轉來呢？』

24「佢就對企在塍頭个人講：『將佢个銀幣拿給該有十隻銀幣个僕人！』

25佢等對佢講：『主人，佢已經有十隻銀幣了！』

26主人講：『𠊎㧯你等講，已經有个，愛給佢還較多；無个，連佢所有个一些些仔也愛搶走。

27還有，該兜對敵無愛𠊎做王來管佢等，將佢等帶來，在𠊎个面前處死！』」

光榮入耶路撒冷(馬太 21:1-11；馬可 11:1-11；約翰 12:12-19)

28講了這兜話，耶穌就帶頭行，去耶路撒冷。

29會到伯法其㧯伯大尼，在橄欖山个時，耶穌喊兩個學生先行，

30吩咐佢等講：「你等去頭前个村莊。你等一入去，就會看到一隻還吂有人騎過个細驢仔紽在該位。你等將牠解開，牽來這位。

31若係有人問你等：『做麼介解開細驢仔？』你等就講：『主 愛用牠。』」

32佢等就去，所堵到个情形㧯耶穌對佢等講个完全共樣。

33佢等將細驢仔解開个時，驢仔个主人問佢等講：「你等做麼介解開細驢仔？」

34佢等就應講：「主愛用牠。」

35然後，佢等將細驢仔牽到耶穌該位，將自家个衫搭在驢仔个背囊頂，扶耶穌騎上去。

36耶穌向前行个時，大家用自家个衫鋪在路上。

37佢行會到耶路撒冷，愛對橄欖山个山排下去个時，歸陣學生因為所看過个一切奇事就歡喜感謝上帝，大聲喊講：

38願上帝賜福給奉主名來个王！

天頂有平安，榮光歸給至高个上帝！

39人群中有幾個法利賽人對耶穌講：「先生，你愛責備你个學生，喊佢等恬恬！」

40耶穌應講：「𠊎㧯你等講，佢等若係毋出聲，這兜石頭就會喊起來。」

耶穌為到耶路撒冷噭

41近耶路撒冷个時，耶穌看到該城，就為到它噭，

42講：「你今晡日若係知該兜有關你和平个事就好了！可惜，你這下看毋出該兜事。

43日仔會到，該時你个仇敵會起泥牆包圍你，對四面圍近來，將你困到死死。

44佢等會徹底消滅你㧯你城牆肚个人民，一垤石頭也毋會疊在另外一垤石頭个頂高，因為你無認出上帝來拯救个時機。」

耶穌潔淨聖殿(馬太 21:12-17；馬可 11:15-19；約翰 2:13-22)

45耶穌一入聖殿，就將做生理个人逐出去，

46對佢等講：「聖經記載上帝个話講：『𠊎个聖殿愛做祈禱个殿』，你等卻將它變做賊竇！」

47耶穌逐日在聖殿肚教示人。祭司長、經學教師，㧯民間个領袖想愛殺害佢，

48總係毋知愛樣般下手；因為眾人盡愛聽佢講話，聽到耳側側。