耶利米書 41 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1該年七月，王族个後代，也係王个一位官員，以利沙瑪个孫仔 — 尼探雅个孻仔以實瑪利，帶等十個人到米斯巴去見亞希甘个孻仔基大利總督。佢等共下食飯个時，

2尼探雅个孻仔以實瑪利㧯跈佢共下來个十個人用刀仔，將沙番个孫仔 — 亞希甘个孻仔基大利㓾掉；基大利就係巴比倫王指定做管理這地方个總督。

3以實瑪利也㓾掉㧯基大利留在米斯巴个猶大人，並當時在場个巴比倫軍人。

4第二日，在無人知基大利被人㓾掉以前，

5有八十個人對示劍、示羅㧯撒馬利亞來。佢等剃掉鬍鬚，扯爛衫，割傷自家个身體，並帶來素祭㧯乳香，愛到上主个聖殿去。

6尼探雅个孻仔以實瑪利對米斯巴出來，緊行緊噭去迎接佢等。佢一看到佢等，就㧯佢等講：「請來看亞希甘个孻仔基大利！」

7佢等一入城，尼探雅个孻仔以實瑪利㧯佢个部下就出手㓾佢等，將身屍㧒落窟肚。

8佢等當中有十個人向以實瑪利哀求：「毋好㓾𠊎等！𠊎等有盡多大麥、小麥、橄欖油㧯蜂糖，囥在田項。」以實瑪利就無㓾佢等。

9以實瑪利將㓾死个身屍㧒落窟肚，該窟仔非常大 。這係頭擺亞撒王為到防備以色列王巴沙个攻擊挖个。以實瑪利用該兜人个身屍將窟仔坉滿起來。

10接等，以實瑪利將國王該兜妹仔㧯所有留在米斯巴个人捉起來，愛帶到亞捫人該位去。這兜人係侍衛長尼布撒拉旦交給亞希甘个孻仔基大利管。

11 加利亞个孻仔約哈難㧯跈佢該兜軍官聽到尼探雅个孻仔以實瑪利所犯个罪，

12就帶領部下追尼探雅个孻仔以實瑪利，愛㧯佢相㓾，在基遍附近大陂塘滣追到佢。

13被以實瑪利捉去該兜人民看到加利亞个孻仔約哈難㧯跈佢个軍官，就非常歡喜。

14恁樣，以實瑪利對米斯巴捉去个所有人民就轉身走到加利亞个孻仔約哈難該位去。

15總係尼探雅个孻仔以實瑪利㧯佢八個部下對約哈難个手下逃走，到亞捫人該位去。

16恁樣，加利亞个孻仔約哈難㧯跈佢該兜軍官對以實瑪利手中將以實瑪利暗殺基大利以後對米斯巴捉走該兜人民對基遍救轉來，其中有軍人、婦女、細人仔㧯太監。

17-18佢等當驚巴比倫人，因為尼探雅个孻仔以實瑪利暗殺巴比倫王所指定做管理這地方个總督，就係亞希甘个孻仔基大利。為到閃開巴比倫人，佢等愛到埃及去，在伯利恆附近个金罕館 停留下來。