1上主啊，求你聽𠊎个祈禱！
求你側耳來聽𠊎个懇求！
求你照你个信實㧯公義來應𠊎！
2求你毋好審判𠊎 — 你个僕人，
因為在你面前無一儕係義个。
3𠊎个仇敵迫害𠊎，
將𠊎打橫到貼貼。
佢將𠊎關在烏暗个地方，
𠊎像係已經死盡久个人。
4所以𠊎个心神發咄愕；
𠊎个內心也著驚絕望。
5𠊎回想先前該兜日仔；
𠊎愐想你所做个一切，
𠊎緊唸你个手所做个。
6𠊎對你擎手祈禱；
𠊎个心當渴慕你，
像旱地緊等雨水。
7上主啊，求你遽遽應𠊎哪！
𠊎个心神等到會昏掉囉！
求你毋好揞面毋搭𠊎，
免得𠊎像該兜等死个人。
8使𠊎天一光就得到你个慈愛，
因為𠊎所信靠个就係你。
求你指示𠊎應當行个路，
因為𠊎个心神仰望你。
9上主啊，𠊎尋求你个庇佑；
求你救𠊎脫離𠊎个仇敵！
10你係𠊎个上帝；
求你教𠊎遵行你个旨意。
你个靈係至善；
求你帶領𠊎行平直个路。
11上主啊，為到你个名，
求你拯救𠊎；
求你照你个公義救𠊎脫離患難！
12因為你不變个慈愛，
求你剪除𠊎个仇敵，
滅盡所有壓迫𠊎个；
因為𠊎係你个僕人。
Who We AreWhat We EelieveWhat We Do
2025 by iamachristian.org,Inc All rights reserved.
