民數記 36 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

承接產業个女人結婚个條例

1 約瑟个孻仔瑪拿西个孫仔，也就係瑪吉个孻仔基列，佢个宗族該兜家長去見摩西㧯以色列人其他領袖，

2講：「上主識命令你等用抽籤个方法將土地分給以色列人，也命令你等將𠊎等親屬西羅非哈个產業分給佢該兜妹仔。

3總係，若係姖等嫁給以色列別支族个人，姖等个產業就會屬厥老公个支族了。恁樣，𠊎等抽籤所得到个土地就會減少。

4到以色列人个禧年，所有賣出去个產業全部愛歸還原主；西羅非哈該兜妹仔个產業就會永遠屬在逐儕老公个支族，𠊎等个支族就會永遠失掉該份產業。」

5所以摩西將上主个命令㧯以色列人講：「約瑟支族个人所講个話係著个。

6所以上主吩咐講：西羅非哈該兜妹仔做得自由選老公，總係一定愛在阿爸个支族內來選。

7恁樣，以色列人个產業就毋會對一支族轉到另外一支族去。逐個以色列人个產業一定愛留在本支族內。

8以色列各支族中，所有承接產業个細妹仔，一定愛嫁給共支族个人。恁樣，以色列人逐儕就能承接祖先所傳下來个產業，

9產業就毋會對一支族轉到另外一支族去；以色列逐支族應該保留本族个產業。」

10-11所以，西羅非哈个妹仔瑪拉、得撒、曷拉、密迦、挪阿遵照上主命令摩西个話，嫁給姖等个叔伯兄弟。

12姖等全部在約瑟个孻仔瑪拿西支族內尋到老公。姖等个產業就保留在姖等阿爸个支族內。

13以上係上主在耶利哥對面約旦河滣个摩押平原、通過摩西傳給以色列人个例規㧯條文。