歷代志下 23 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

反叛亞她利雅(列王紀下 11:4-16)

1到第七年，祭司耶何耶大認為應該可以行動了。佢㧯五個軍官結盟；這五個人係耶羅罕个孻仔亞撒利雅、約哈難个孻仔以實瑪利、俄備得个孻仔亞撒利雅、亞大雅个孻仔瑪西雅、細基利个孻仔以利沙法。

2佢等行透猶大逐城，召集利未人㧯逐宗族族長來耶路撒冷。

3佢等在上帝个聖殿肚聚集，㧯王个孻仔約阿施立約。耶何耶大對佢等講：「這係先王个孻仔。這下佢應該做王，照上主應許給大衛王後代个話。

4你等愛恁樣做：安息日，祭司㧯利未人當班个時，當中三分之一个人愛看守聖殿个門，

5三分之一个人愛看守王宮，三分之一个人愛看守根基門；所有个人民愛集合在上主聖殿个院內。

6祭司㧯當班个利未人以外，麼人都做毋得入上主个聖殿。因為祭司㧯利未人係歸屬上主个，做得入去；其他个人民一定愛遵守上主个規定留在外背。

7利未人愛在王个周圍擎武器保護王；王行到㖠位就跈到㖠位。麼人入去聖殿就將佢㓾掉。」

8 利未人㧯猶大个人民全部照祭司耶何耶大个指示做。安息日無當班个人也愛值班；所以，無論當班抑係無當班个，逐個官長全部派出來。

9祭司耶何耶大將以前放在聖殿肚大衛王該兜槍㧯盾牌交給軍官，

10派民眾拿等武器企在聖殿頭前，對南片到北片，在祭壇㧯聖殿該位，愛在王子四周圍保護佢。

11然後，耶何耶大㧯佢該兜孻仔帶王子約阿施出來，將王冠戴在佢个頭那頂，將一本有關王權條款个法律書交給佢，立佢做王。佢等膏油設立約阿施；民眾全部大聲喊：「願王萬歲！」

12 亞她利雅太后聽到民眾走等對王歡喜盡嘶个聲，遽遽到群眾聚集个聖殿去。

13姖看到新王照儀式企在聖殿入口个柱仔堘頭，該兜軍官㧯歕喇叭个圍等佢。民眾全部歡喜到大聲嘶，盡歕喇叭；聖殿歌手彈奏樂器，帶領人歌唱讚美。亞她利雅扯爛衫，喊講：「造反了！造反了！」

14祭司耶何耶大無愛亞她利雅在上主个聖殿該位被人㓾死，吩咐該兜軍官講：「將姖對守衛當中帶出去；敢救姖个，共樣愛俾佢死。」

15所以，佢等捉等亞她利雅，將姖帶到王宮，在馬門該所在將姖㓾掉。

耶何耶大个改革(列王紀上 11:17-20)

16祭司耶何耶大㧯人民並約阿施王立約，全部愛做上主个子民。

17所以大家去巴力廟，將廟拆掉，敲掉祭壇㧯偶像，又在祭壇頭前㓾掉巴力个祭司馬坦。

18耶何耶大派祭司㧯利未人負責上主聖殿个工作。佢等愛執行大衛所指定个任務，就係照摩西个法律向上主獻燒化祭，並照大衛所定个負責音樂㧯慶典。

19耶何耶大也派守衛在上主聖殿个逐門口看守，毋准禮儀上無淨浰个人入去。

20 耶何耶大帶領所有軍官、貴族、民間領袖、㧯其他个人民，護送王對聖殿到王宮；佢等對大門入去；王坐上寶座。

21全國人民歡喜快樂，城肚也當平靜，因為該時亞她利雅已經被人㓾死。