1 約伯應講：
2請你等認真聽𠊎个話；
這係你等做得給𠊎惟一个安慰。
3拜託，請給𠊎一個講話个機會，
𠊎講煞，你等正來恥笑𠊎還毋會慢。
4𠊎所拗个並毋係對人；
所以𠊎正會恁著急啊！
5看等𠊎，你等敢毋會發癡驚？
你等敢毋係嚇到無話講！
6想到𠊎所堵到个一切，
𠊎就驚到歸身愊愊掣。
7壞人做麼介繼續生下去？
做麼介享長壽、興旺、發達？
8佢等毋單淨子孫滿堂，
還親目看等後代長大。
9佢等个屋下平安，毋使驚麼介；
上帝責罰个棍仔無臨到佢等。
10佢等个牛牯傳種一定成功；
佢等个牛乸𫱔子毋會落胎。
11佢等个子女出去聊，自由自在像羊群；
佢該兜細人仔歡喜到緊走、緊跳。
12佢等和等鈴鼓㧯琴來唱歌；
佢等跈等歕笛个聲來歡呼。
13佢等一生人豐豐富富，
平平安安入到墳墓 去。
14壞人對上帝講：「遠遠離開𠊎等！
𠊎等一生人無愛尋你个旨意。
15全能者係麼人，有麼介好敬拜？
𠊎等向佢祈禱又有麼介好處？」
16壞人看自家个成功係打拚來个；
總係這種想法𠊎絕對毋會贊成。
17敢講壞人个燈識烏掉嗎？
敢講災難識臨到佢等嗎？
上帝識發譴責罰壞人嗎？
18佢敢識將佢等吹散，像大風吹散禾稈？
佢敢識將佢等捲走，像狂風捲走礱糠？
19你等講，因為壞人積惡，上帝定著會責罰佢等个子女；
𠊎認為，上帝愛責罰罪人本身，
俾佢等承擔自家个罪過正著。
20罪人應該承受自家愛受个責罰；
俾佢等親身體驗全能者个發譴。
21人在世間个年日會結束个時，
還能照顧自家子女个幸福嗎？
22連坐大位个人也會被上帝審判，
人个智識樣有可能來教上帝呢？
23有兜人一生人勇健，
到死享受平安幸福。
24佢等个肚笥膕膕；
骨髓也得到滋潤。
25有兜人到死心肝痛苦，
一生人毋識享受快樂。
26總係這兩種人共樣會死，愛埋，
身屍共樣會在泥塥肚被蟲食。
27𠊎知你等心肚所想个，
知你等陷害𠊎个陰謀。
28你等問：「該隻霸王住在㖠位？
該隻壞東西个屋下在㖠位？」
29你等敢毋識問過路人？
你等敢毋知佢等帶轉來个報告？
30在上帝發譴責罰人个日仔，
壞人常常閃走、顛倒無事情。
31敢有麼人當面責備壞人？
抑係照佢所做个報復佢？
32就係佢被人扛到墓地，
葬在有人掌个墳墓時，
33有一大陣个人去送葬，
連墓地个泥也盡燥爽。
34你等樣還講空話來安慰𠊎！
你等講个話逐句都係憨蚩！
Who We AreWhat We EelieveWhat We Do
2025 by iamachristian.org,Inc All rights reserved.
