1 以色列人離開埃及以後四百八十年，所羅門做以色列王第四年二月，就係西弗月，所羅門開工起上主个聖殿。
2聖殿內部有二十七公尺長，九公尺闊，十三公尺半高。
3入門口个門廊有四公尺半深，九公尺闊，㧯聖殿平闊。
4聖殿个壁項有窗門；窗門外背細，底背大。
5靠等外壁，在聖殿个兩片堘頭㧯後背，起三層樓房，逐層兩公尺兩公寸高。
6最下層个樓房逐間有兩公尺兩公寸闊；中央該層个樓房有兩公尺七公寸闊；頂高該層个樓房有三公尺一公寸闊。逐層个聖殿外壁全部比下層較薄，留有崁；恁樣，樓房做得起在崁頂，毋使在壁項鑿孔來放橫樑。
7起殿用个石頭係在沙石場鑿好个，所以起聖殿个時聽毋到鎚仔、斧頭㧯其他鐵器个響聲。
8樓房最下層 个入口，在聖殿个南片，有樓梯通到第二層㧯第三層。
9所羅門王完成聖殿个建造。佢用香柏樹做樑㧯天花板。
10該三層樓房，逐層有兩公尺兩公寸高，係靠等聖殿个外壁起个，也係用香柏樹个樑㧯外壁連共下。
11上主對所羅門講：
12「若係你遵守𠊎个法律誡命，𠊎一定會實現𠊎向若爸大衛所講个應許。
13𠊎會住在你所起个這聖殿，住在𠊎个子民以色列當中，永遠毋會離開佢等。」
14恁樣，所羅門完成起聖殿个工作。
聖殿內部个裝飾(歷代志下 3:8-14)15聖殿內壁，對地面到天花板，全部係用香柏樹个枋仔裝璜个；地泥下係松樹个枋仔鋪等。
16有一間內殿，就係至聖所，起在聖殿內肚个後向，長九公尺；對地枋到天花板全部用香柏樹个枋仔隔開。
17內殿前向个外殿，就係聖所，長十八公尺。
18香柏樹个枋仔全部刻等葫蘆㧯花个圖形。歸間聖殿內部攏總用香柏樹料裝璜，看毋到壁項个石頭。
19佢在聖殿內肚个後向準備內殿；上主个約櫃愛安放在該位。
20內殿長九公尺，闊九公尺，高九公尺，內肚全部貼純金。香壇用香柏樹个枋仔包等 。
21所羅門用純金貼聖殿个內部，又用金鍊仔掛在內殿个入口；內殿也係貼金仔。
22歸間聖殿內部全部貼等金仔，㧯至聖所底背个香壇共樣。
23佢用橄欖樹做兩個基路伯放在至聖所，逐個有四公尺四公寸高。
24-26兩個基路伯平大、共樣形狀，全部有兩隻翼胛；逐隻翼胛兩公尺兩公寸長。所以，對這隻翼胛尾到該隻翼胛尾係四公尺四公寸。
27佢將兩個基路伯並排放在至聖所；恁樣，它兜伸開个翼胛在內殿中央互相接到，另外兩隻翼胛揬到兩片个壁。
28這兩個基路伯全部係金仔包个。
29內殿㧯外殿个壁項全部有雕刻基路伯、棕樹㧯花。
30內殿㧯外殿个地枋面頂也有貼金仔。
31至聖所个入口有兩扇橄欖樹做个門。門楣係尖形个 ，
32門扇有雕刻基路伯、棕樹㧯花；基路伯㧯棕樹全部係用金仔鑲个。
33外殿个入口係橄欖樹做个四角形个門框。
34兩扇門係松樹做个，逐扇做得對摺起來。
35門扇項刻等基路伯、棕樹㧯花；它兜全部係用金仔鑲个。
36佢又用三層石頭隔一層香柏樹个樑起內院。
37聖殿个地基係在所羅門做王个第四年二月，就係西弗月打好个。
38所羅門在位第十一年八月，就係布勒月，聖殿完全照所計劃个樣式起好。所羅門用掉七年个時間完成起聖殿个工程。
Who We AreWhat We EelieveWhat We Do
2025 by iamachristian.org,Inc All rights reserved.
