1上主恁樣講：「看啊，𠊎愛派有毀滅性个風差 去攻擊巴比倫㧯住在立加米
个人。2𠊎愛使外國人來毀滅巴比倫，像風差將麥稈吹走。毀滅个日仔一到，佢等會對四面八方來攻擊巴比倫，使姖个土地變荒涼。
3毋俾姖个戰士有機會射箭，毋俾佢等有時間裝備自家。連該兜後生人个命也毋肯放佢等過！愛將巴比倫全軍消滅！
4佢等一定會在巴比倫个地方、在自家个街巷被人㓾掉。
5雖然以色列㧯猶大充滿違背以色列聖者个罪，總係𠊎 — 上主、萬軍个元帥、佢等个上帝並無㧒掉佢等。
6逃命啊，你等愛遽遽逃出巴比倫！毋好㧯姖个罪共下死。因為𠊎這下愛照巴比倫所應該受个報應責罰姖。
7巴比倫頭擺像𠊎 — 上主手中个金杯，使天下个人全部酒醉了。列國啉姖个酒就癲掉。
8這下巴比倫忽然間陷落、毀滅了！你等愛為姖傷心大噭！尋乳香來膏姖个傷口，無一定姖還會醫好。
9住在巴比倫个外國人講：『𠊎等想愛醫巴比倫，總係醫毋好。這下𠊎等愛離開姖，逐儕轉故鄉去！因為姖个罪惡堵天，定著愛受當重个責罰 。』」
10上主講：「𠊎个子民會大聲喊講：『上主已經為𠊎等伸冤。來啊！𠊎等到錫安去，在該位宣揚上主 — 𠊎等个上帝所做个事。』」
11上主愛毀滅巴比倫，為自家受毀壞个聖殿報復。佢就激米底亞該兜王發命令講：「磨利箭頭！捉住盾牌！
12軍旗擎起來，準備攻打巴比倫个城牆！加強防備！派出巡邏兵！設好埋伏！」
上主已經照佢所講个旨意對付巴比倫人民。
13雖然巴比倫有盡多河壩、盡多財寶，總係姖个結局定著了，除滅姖个時到了。
14上主 — 萬軍个元帥指佢自家發誓講：「𠊎愛召集大軍，像草蜢恁樣，歸群來攻打佔領巴比倫；佢等會因為勝利歡喜到盡嘶。」
頌讚上帝个詩歌15上主用能力創造大地；
佢用智慧建立世界，
用聰明展開天空。
16佢一響雷公，天空个水就吼吼滾；
佢使雲對地平線衝等上。
佢使𥍉爧在雨中發光；
佢使風對自家个倉庫吹出。
17人對這光景全部戇檔，無智識；
打金師傅造偶像，反轉無面子，
因為佢等造个神明係假个，毋會透氣。
18偶像全係虛空，係當見笑个東西；
上主審判个時，它兜全部會消滅。
19 雅各个上帝毋係像這兜偶像；
佢創造萬物，
揀選以色列做自家个子民。
上主 — 萬軍个元帥係佢个名。
上主个鐵鎚20上主講：
巴比倫啊，你係𠊎个大鐵鎚，係𠊎个武器。
𠊎用你打擊萬邦，毀滅列國。
21𠊎用你打死戰馬㧯騎士，
將戰車㧯戰士打到糜糜。
22𠊎用你打死男女老幼，
打死細阿哥仔㧯細阿妹仔。
23𠊎用你打死牧人㧯羊群，
打死農民㧯耕田个牛。
𠊎用你打死省長㧯官員。
責罰巴比倫24上主講：「猶大人民啊，你等會親目看到𠊎向巴比倫㧯姖个人民報復，因為佢等做壞事傷害錫安。
25巴比倫啊，你係毀滅大地个山嶺；總係𠊎 — 上主愛㧯你做對敵。𠊎愛將你拉下來，削平，將你燒掉。
26你底背个石頭毋會再拿來做屋角石抑係做石腳。你愛永遠荒廢。𠊎 — 上主恁樣宣佈了。
27「愛擎起你等个軍旗！去到列國歕羊角！召集萬國去攻打巴比倫！召集亞拉臘、米尼、㧯亞實基拿該兜國家共下去攻打。指定軍長去指揮相㓾，調派像草蜢恁多个兵馬去攻打。
28召集萬國，去攻打巴比倫。召集米底亞該兜王、佢等个省長、官員、㧯佢等所治理各國个軍隊去攻打。
29大地盡顫盡搖，因為𠊎 — 上主在執行𠊎个旨意，愛使巴比倫荒廢，無人住。
30巴比倫个勇士放掉武器，囥在城堡底背。佢等失掉勇氣，像婦女恁軟弱。城門个門閂全部斷掉！屋仔𤏸火燒！
31報信个人一個接一個向巴比倫王報告：『京城四圍被人佔領了！
32敵人佔領渡船頭，放火燒掉城堡 ！戰士驚到愊愊掣！』
33無幾久，敵人會消滅佢等；巴比倫會像曬榖个禾埕恁樣被人踏來踏去。𠊎 — 上主、萬軍个元帥、以色列个上帝恁樣宣佈了。」
34 巴比倫王尼布甲尼撒將耶路撒冷吞掉，
將城搶到淨淨，
使姖變到像空罌仔共樣。
佢像大海怪恁樣吞食耶路撒冷个財寶，
將城寶貴个東西吞落去，
將賸到个呸出去。
35 錫安个人民全部會講：
巴比倫對待𠊎等恁壞；
𠊎等應該愛報復姖！
耶路撒冷人全部會講：
巴比倫人流𠊎等个血；
𠊎等應該向佢等討血債！
上主愛幫助以色列36所以上主對耶路撒冷人民講：「𠊎愛為你伸冤，為你等報仇。𠊎愛使巴比倫个水源燥掉，河壩變無水。
37巴比倫會成做荒埔，成做野狗个竇，成做害人驚到發咄愕、被人嘲謔个所在，無人住。
38巴比倫人會像獅仔歸群吼吼滾，像細獅仔歸隊大聲嘶。
39佢等食到當興个時，𠊎愛為佢等準備筵席，使佢等啉到酒醉，歡喜到睡毋知醒，永遠毋會䟘。
40𠊎愛帶佢等去被人㓾，像逐細羊仔、綿羊牯、山羊牯入屠宰場。𠊎 — 上主恁樣宣佈了。」
巴比倫个命運41上主講：「巴比倫
樣會被人打橫，全世界所讚美个大城樣會被人佔領！巴比倫成做害列國驚到發咄愕个國家。42海水會漲起來，大浪會浸掉巴比倫。
43城市會變做荒地、旱地、沙漠；無人住，也毋會有人經過。
44𠊎愛責罰巴比倫个神明彼勒，迫它嘔出所吞个財物。列國毋會再去拜它。
「巴比倫个城牆橫掉了！
45𠊎个子民啊，遽遽走，離開該所在！愛逃命，閃開𠊎个大發譴！
46毋好因為聽到地方上个謠言嚇到無膽；逐年有無共樣个風聲傳來 — 謠傳國內會有戰亂，官長互相鬥爭。
47看啊，日仔會到，𠊎愛責罰巴比倫个偶像。歸隻國家會受到羞辱，被人㓾死个身屍橫到滿遍係。
48北方个毀滅者會來毀滅巴比倫；該時，天地㧯其中所有个會歡呼唱歌。
49巴比倫識在全地㓾死當多人，特別係以色列人；這下姖个人民也會照樣被人㓾，姖定著會橫落去。𠊎 — 上主恁樣宣佈了。」
給住在巴比倫个以色列人个信息50上主對住在巴比倫个以色列人講：「你等識逃過刀劍个傷害，這下愛遽遽走，毋好再等了！雖然你等遠離故鄉，總係你等愛想念𠊎 — 你等个上主，也愛懷念耶路撒冷。
51你等講：『𠊎等聽到侮辱个話，感覺盡見笑，因為外國人進入上主聖殿个聖所。』
52所以𠊎 — 上主講，日仔會到，𠊎愛責罰巴比倫个偶像；國內逐所在會有受傷个人緊噌。
53就算巴比倫跋上天，在高高个所在起堅固个城堡，𠊎還係愛派毀滅者對付姖。𠊎 — 上主恁樣宣佈了。」
巴比倫个滅亡54上主講：
聽啊，巴比倫有傷心盡噭个聲！
有大毀滅个聲傳出來。
55𠊎當毀滅巴比倫个時，
會使城肚吵鬧个聲停掉。
敵人个軍隊會像吼吼滾个大浪打等來。
56毀滅者愛來消滅巴比倫。
姖个勇士會被人捉到；
佢等个弓會被人拗斷。
𠊎係行報應个上帝；
𠊎一定會向巴比倫報仇。
57𠊎愛使姖个領袖、謀士、省長、
官員㧯勇士全部啉酒醉；
佢等睡到毋知醒，永遠毋會䟘。
𠊎个名安到上主 — 萬軍个元帥，𠊎係大君王；
𠊎恁樣宣佈了。
58 巴比倫賁賁个城牆會橫到貼貼；
高大个門樓會被火燒掉。
列國所有个努力全部變空空；
佢等一切个勞碌會燒淨淨。
𠊎 — 上主、萬軍个元帥恁樣宣佈了。
耶利米个信息傳到巴比倫59 瑪西雅个孫仔，尼利亞个孻仔西萊雅係西底家王个行宮總管 。西底家做猶大王个第四年，西萊雅愛跈王到巴比倫去。該時，先知耶利米有話吩咐佢。
60耶利米將巴比倫會受到一切个災難㧯有關巴比倫个事全部寫在書卷底背。
61耶利米㧯西萊雅講：「到巴比倫以後，你一定愛將這書卷所有个話讀給人民聽。
62然後你愛祈禱講：『上主啊，你識親身宣佈愛毀滅這所在，使姖永遠荒廢，無人住，連野獸乜無。』
63西萊雅啊，這卷書讀完以後，你愛將這卷書㧯石頭捆共下，豁到幼發拉底河，
64然後講：『巴比倫愛像這卷書共樣沈落去，毋會再浮上來，因為上主愛降災難給姖 。』」
耶利米个話記錄到這位止。
Who We AreWhat We EelieveWhat We Do
2025 by iamachristian.org,Inc All rights reserved.
