1這兜事情以後，𠊎看到另外一個天使對天頂下來。佢有盡大个權柄；佢个榮耀普照大地。
2佢大聲喊講：
橫掉了！
大巴比倫橫掉了，
成做鬼住个所在，
並各樣邪靈㧯各種屙糟又可惡个鳥仔个藪。
3因為列國全部啉過這大淫婦淫亂个烈酒，
地上該兜王識同姖行姦淫，
世間个生理人識通過姖个奢華宴樂賺大錢。
4跈等，𠊎又聽到另外一個聲音對天頂下來，講：
𠊎个子民啊，出來！
對該座城出來！
你等正毋會遰到姖个罪，
也毋使同姖共下受災難。
5因為姖个罪惡堵天，
上帝記得姖个不義。
6照姖對你等所做个對付姖；
照姖个行為加倍來報應姖。
姖樣般調酒交給你等，
就用加倍嚴个酒斟滿姖个杯！
7姖樣般榮光自家，又奢華宴樂，
就樣般苦毒姖，俾姖受盡痛苦。
因為姖一直對自家講：
『𠊎係坐在寶座上个女王，
𠊎毋係寡婦，絕對毋會有悲傷。』
8就係因為恁樣，
悲傷、飢荒、㧯死个災禍，
會在一日之中臨到姖！
姖會被火燒滅，
因為審判姖个主上帝大有能力！
9地面上該兜同姖奢華宴樂行姦淫个王一看到該燒姖个火煙就為姖捶心肝大噭。
10佢等因為盡驚姖所受个痛苦，就遠遠企等，講：
慘了！這座大城慘了！
勇壯个巴比倫城啊，
還無一點鐘久，
你就堵到責罰了！
11世間个生理人也為姖傷心大噭，因為無人再來買佢等个貨了。
12無人買佢等个金、銀、寶石、珍珠；也無人買佢等个麻紗、綢布、高貴个紫色㧯大紅色个布料、各種香木、各樣象牙个製品、貴重个木器、銅器、鐵器、㧯大理石个製品；
13也無人買肉桂、香料、香、香水、乳香、酒、油、麵粉、麥仔、牛、羊、馬、馬車、奴隸、㧯人口等。
14這兜生理人對姖講：
你所貪愛个各種果子已經離開你了；
一切个榮華富貴也無掉去，
無可能尋倒轉來了！
15賣這兜貨、在該座城肚發大財个生理人，因為盡驚姖所受个痛苦，就遠遠企等。佢等傷心大噭，
16講：
慘了！這座大城慘了！
姖一直著等麻紗、
紫色㧯大紅色个衫，
歸身掛等金仔、寶石、㧯珍珠。
17還無一點鐘久，
這一切个財產就失掉了！
所有个船長、旅客、船員，㧯所有靠海謀生个人全部遠遠企等。
18佢等看到該燒姖个火煙，就喊講：「㖠座城能同這座大城比呢！」
19佢等拿泥粉委在自家个頭那頂，傷心大噭，講：
「慘了！這座大城慘了！
海面所有个船，它兜个船主全部係靠姖發財个！
還無一點鐘久，
姖就荒廢掉了！」
20天啊，愛歡喜起來！
因為姖毀滅了！
眾聖徒、各位使徒、㧯眾先知啊，
愛歡喜起來！
因為上帝已經代你等伸冤，責罰姖了！
21接等，有一個盡有力个天使擎起一隻像大磨石恁大个石頭，㧒落海肚去，講：
巴比倫大城也愛像恁樣重重抨掉，
永遠毋會再有人看到姖了！
22在你城肚，毋會再有人聽到有琴師㧯樂師个音樂，
抑係歕笛仔㧯號筒个聲。
各種手藝个師傅再尋毋到；
磨粄个聲再聽毋到了！
23油燈个火毋會再被人點𤏸起來；
也毋會再有人聽到新郎㧯新娘个聲了。
你个生理人一直係世間最有勢力个人；
萬國也攏總被你个邪術迷惑去。
24在這城肚有發現眾先知㧯聖徒，
並所有在世間被人㓾死个人个血。
Who We AreWhat We EelieveWhat We Do
2025 by iamachristian.org,Inc All rights reserved.
