歷代志下 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

準備起聖殿(列王紀上 5:1-18)

1 所羅門決定愛起聖殿，在該位敬拜上主。佢也決定為自家起一座王宮。

2所羅門擇七萬人搬運材料，八萬人在山頂打石，三千六百人監督工程个進行。

3 所羅門派人去對泰爾王希蘭講：「你識㧯吾爸大衛做生理，賣給佢起王宮个香柏樹，請你也恁樣對待𠊎。

4𠊎這下起聖殿，榮光上主 — 𠊎个上帝。這殿會成做神聖个所在，俾𠊎㧯𠊎个人民在該位燒香敬拜上主，在該位一直獻餅，並在逐朝晨暗晡、逐安息日、逐隻月初一、㧯其他聖日獻燒化祭，敬拜上主 — 𠊎等个上帝。佢識命令以色列永遠愛恁樣做。

5𠊎愛起个聖殿當大，因為𠊎等个上帝比所有个神明較偉大。

6無人有辦法為上帝起聖殿，因為就算天㧯天頂个天也毋罅佢住。𠊎算麼介？有法度為佢起聖殿嗎？只做得起燒香个殿定定。

7這下，請你派一個好手藝个師傅來，會雕刻，會用金銀銅鐵打造東西，會刺藍色、紫色、紅色个布。這個人愛㧯猶大並耶路撒冷該兜師傅，就係吾爸大衛選出來个師傅，共下做工。

8𠊎知你斬樹仔个工人當有技術，所以請你對黎巴嫩運香柏樹、松樹、檀香樹給𠊎。𠊎愛派人去協助你个工人，

9準備當多个樹仔，因為𠊎所愛起个係一座高大堂皇个聖殿。

10𠊎會給若倒樹仔个工人兩千公噸小麥，兩千公噸大麥，四十萬公升个酒，㧯四十萬公升个橄欖油。」

11 泰爾王希蘭回信給所羅門，講：「因為上主惜佢个子民，就設立你做佢等个王。」

12希蘭又講：「頌讚上主 — 以色列个上帝、天地个創造者！佢賜給大衛王一個恁有聰明智慧个孻仔；這孻仔打算為上主起聖殿，也為自家起王宮。

13𠊎這下派一個非常聰明、好手藝个師傅給你；佢个名安到戶蘭，

14厥姆係但支族人，厥爸係泰爾本地人。佢盡會用金、銀、銅、鐵、石頭、木材來打造東西，也會刺藍色、紫色、紅色个布，還會刺麻紗。佢會用逐種材料雕刻，也會照所有个設計來雕刻。你做得俾佢㧯你个師傅並若爸大衛王个師傅共下工作。

15這下，請吾主將答應个小麥、大麥、酒、橄欖油運給僕人。

16𠊎等會在黎巴嫩山斬你所需要个木材，捆做木排，對海路運到約帕，你就對該位運到耶路撒冷去。」

聖殿工程開工(列王紀上 6:1-38)

17 所羅門調查所有暫住在以色列个外族人 (像厥爸大衛以前所做个戶口調查)，總共有十五萬三千六百儕。

18佢派佢等當中个七萬人搬材料，八萬人在山頂打石，又指定三千六百個工頭來監督佢等个工作。