詩篇 19 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝創造个榮光 大衛个詩，交給聖歌隊長。

1普天傳揚上帝个榮光；

穹蒼顯明佢手所做个。

2日日講起，

夜夜傳揚；

3毋使言語，

毋使音響。

4它兜个信息 傳到人間；

它兜个話語傳遍天下。

上帝在天頂為到日頭搭帳篷；

5日頭像新郎歡歡喜喜出洞房，

又係像勇士快快樂樂走相逐。

6它對天个這片出來，

𫟧到天个該片去；

萬物全部得到它个熱氣。

上主个教示

7上主个教示完全，

會使人个生命換新；

上主个法令信實，

會使單純人得到智慧；

8上主个教訓公正，

會使人个心有快樂；

上主个誡命清明，

會使人个目珠光明。

9敬畏上主係純潔个事 ，

永遠存留；

上主个法則正直，

攏總公當。

10這兜比金仔較寶貴，

贏過上等个金仔；

比蜂糖較甜，

贏過最純个蜂糖。

11這兜使你个僕人明白 ；

小心遵守，好處無限。

12總係麼人會看到自家个毋著啊？

求你赦免𠊎無意中所犯个過失。

13求你使你个僕人莫故意犯罪，

莫俾罪惡控制𠊎。

恁樣，𠊎正會做一個無好嫌个人，

免得犯悖逆个大罪。

14上主 — 𠊎个磐石，𠊎个救贖者啊，

願𠊎个言行思想得到你个鑒納。