以賽亞書 22 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

有關耶路撒冷个信息

1下背係有關「異象山壢」个信息。

發生麼介事？全城个人做麼介上屋頂去呢？

2全城鬧鬧熱熱，逐所在充滿歡喜。

你等个同胞死掉，並毋係死在刀劍㧯戰場。

3你等个領袖吂射一枝箭就被人捉到；逃到遠方个戰士也被人捉轉來。

4這下毋好來插𠊎，由在𠊎大聲噭！毋好來安慰𠊎，因為𠊎个同胞全部死掉了。

5在「異象山壢」中，這係著驚、失敗、混亂个日仔；這係至高个上主 — 萬軍个元帥所加給𠊎等个。𠊎等个城牆被人攻橫，求救命个聲在山壢中緊應聲。

6 以攔个騎兵㧯戰車來了，箭袋肚裝滿箭。吉珥个步兵也拿等盾牌前來。

7猶大盡肥个山壢中滿滿係戰車；騎兵在耶路撒冷城門前擺陣、準備相㓾。

8猶大个防線被人攻破。

該時，你等倚靠兵器倉庫拿出來个武器。

9-10你等看到大衛城个城牆有盡多爛孔，等等你等去補。你等巡查耶路撒冷所有个屋仔，拆掉一部份，拿拆下來个石頭補城牆爛孔个所在。為到積存罅額个水，

11你等在兩扇城牆之間挖一個水池，將舊水池个水透到該位去。所有這兜事情上帝早就安排好勢、也做到當好；總係你等毋聽佢个話、毋插佢。

12該時，至高个上主 — 萬軍个元帥喊你等哀傷大噭，剃光頭那毛，著麻衫。

13總係，你等還在歡喜快樂。你等㓾牛羊，大食大啉。你等講：「現食現好，會死韶早。」

14𠊎親耳聽到上主 — 萬軍个元帥㧯𠊎講：「佢等一日還在，𠊎就一日毋赦免佢等个罪惡。𠊎 — 至高个上主、萬軍个元帥恁樣宣佈了。」

對舍伯那个警告

15至高上主 — 萬軍个元帥吩咐𠊎去見宮廷个事務大臣舍伯那，警告佢：

16「你係麼人，樣敢在山邊个磐石中為自家挖墳墓？

17你自家恅到係重要个人物；總係上主愛將你拈起來又㧒出去，

18將你捲做一團，㧒到一個大國去。你會死在該位，死在你一直恅到當光榮个戰車堘。你恁樣羞辱王室！

19上主毋准你坐高位，愛將你拉下來。」

20上主對舍伯那講：「該時，𠊎愛將𠊎个僕人 — 希勒家个孻仔以利亞敬喊來。

21𠊎愛拿你个朝服給佢著，拿你个腰帶被佢繫；𠊎愛將你个權力全部交給佢。佢會像阿爸恁樣看顧耶路撒冷㧯猶大个人民。

22𠊎愛將大衛王朝个鎖匙交給佢。佢所打開个，無人能關；佢關掉个，無人能開。

23𠊎愛將佢放在穩固个所在，像用釘仔釘住住恁樣；佢个全家會因為佢來得到榮耀。

24「總係，厥爸屋下个子子孫孫會成做佢个重擔。佢等全部倚賴佢，像鑊仔㧯酒罌掛在樹釘頂高一樣。

25有一日，該當紮个樹釘會因為忒重磧到斜斜，致到斷截；掛在樹釘頂高个東西全部會跌下來。」上主 — 萬軍个元帥恁樣宣佈了。