提摩太前書 6 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1凡在軛下做奴僕个，應當盡尊重自家个主人，免得上帝个名㧯𠊎等个教訓被人譭謗。

2奴僕若有信基督个主人，毋好因為佢等係主內个兄弟就看輕佢等；反轉愛更加煞猛服事，因為受服事來得到利益个人就係親愛个信徒。

假教訓㧯真利益

你一定愛教導並勸話這兜事情。

3若有人傳別樣个教訓，毋聽從𠊎等主耶穌基督健全个道理㧯𠊎等所傳敬虔个教訓，

4就係自高自大，極無智識。這種人好辯論，又好摳字眼；結果就生出嫉妒、相爭、譭謗、㧯疑狐，

5害該兜壞心術、喪失真理个人冤家無停。在佢等个心眼中，敬虔不過係發財个門路定定！

6無毋著，人若知足，敬虔的確會使佢得到大利益。

7𠊎等來這世間，雙手空空；𠊎等也帶毋走麼介！

8𠊎等若有好食，有好著，就愛知足。

9該兜想愛發財个人陷入誘惑个底背，被多多無知㧯會害人个慾望纏等，最後就沈淪滅亡掉去。

10貪財係萬惡个根源。有兜人因為貪愛錢財就離開信仰个道路，自家受盡痛苦，傷害心靈。

給提摩太个指示

11論到你這屬上帝个人，你愛閃避這兜事。愛追求正義、敬虔、信心、愛心、忍耐、㧯溫柔。

12在信仰个比賽頂高，你愛盡命仔走，為自家贏到永遠个生命；為到這個永生，你被上帝呼召，也在多多證人个面前，已經公開宣告這美好个信仰。

13其實，基督耶穌在龐修‧彼拉多面前做證个時，識做美好个宣告。在賜生命給萬物个上帝㧯這位耶穌面前，𠊎吩咐你：

14愛無缺點、無好嫌遵守你所接受个命令，直到𠊎等个主耶穌基督顯現該日。

15時機成熟个時，上帝會喊佢顯現；上帝係堪得稱頌、獨一無二个主宰，萬王个王，萬主个主。

16唯有佢係毋會死个。佢住在人無辦法接近个光底背；無人識見過佢，也無人看得到佢。願尊貴㧯永遠个權柄歸給佢！阿愐。

17該兜在今生富足个人，你愛警戒佢等：毋好驕傲；毋好將希望放在無定著个錢財頂高；反轉愛倚靠將萬物豐豐富富賜給𠊎等享受个上帝。

18愛吩咐佢等行善，在好事上富足，甘心救濟，樂意分享。

19恁樣做，就係為自家積存財寶，為將來建立堅固个地基，來把扼真个生命。

20 提摩太啊，你愛好好保守所託付你个。愛避免該兜無敬虔个空談，㧯所謂「智識」个爭論。

21有兜人恅到自家已經有這智識，結果卻迷失信仰个方向。

願上帝賜恩典給你等！