1兄弟姊妹啊，關係聖靈个恩賜，𠊎希望你等會明白。
2你等知，你等頭擺信異教个時，常常受迷惑行到叉路去，受該兜無生命个偶像轄制。
3𠊎㧯你等講，每一個被上帝个靈感動个人一定毋會講「耶穌應該受咒詛」。共樣，若毋係聖靈感動，也無人能承認「耶穌係主」。
4恩賜有盡多種，總係賜恩賜个係共一位聖靈。
5事奉有盡多種，總係所事奉个係共一位主。
6工作有盡多種，總係在萬民中間使萬事運行个係共一位上帝。
7聖靈顯明在逐儕身上个方式雖然無共樣，總係目的係共樣，係愛使大家得到利益。
8聖靈賜這人智慧个信息；總係共一位聖靈賜另外一個人智識个信息。
9共一位聖靈賜這個人信心，賜另外一個人醫病个能力；
10共一位聖靈賜給這個人行神蹟个能力，給另外一個人傳上帝道理个恩賜；有人得到分別眾靈个能力；有人會講屬靈个語言；也有人會解釋屬靈个語言。
11總係，這一切係共一位、獨一个聖靈所運行，照自家个旨意賜給逐儕个。
一個身體有盡多肢體12人只有一個身體，總係有盡多肢體；肢體雖然盡多，還係一個身體。基督个身體也係像恁樣。
13毋單淨恁樣，𠊎等無論係猶太人抑係外邦人，係做奴隸个抑係自由人，全部已經通過共一位聖靈來領洗禮，成做一個身體，共下享受共一位聖靈。
14身體毋係只有一個肢體，還係有盡多肢體。
15若係腳講：「𠊎毋係手，所以𠊎無屬身體」，它毋會因為恁樣就無屬身體。
16若係耳公講：「𠊎毋係目珠，所以𠊎無屬身體」，它也毋會因為恁樣就無屬身體。
17若係歸身通體係目珠，愛樣般聽呢？若係歸身通體係耳公，愛樣般鼻呢？
18總係，上帝照自家个旨意，將該兜無共樣个肢體全部安在人个身上。
19若係歸身个肢體全部共樣，樣般做得算做身體呢？
20事實上，肢體有盡多，身體只有一個。
21所以，目珠做毋得對手講：「𠊎無需要你！」頭那也做毋得對腳講：「𠊎無需要你！」
22顛倒，身上該兜像係較軟弱个肢體，還較係做毋得缺少个。
23𠊎等个身體，該兜看來無恁重要个部份，反轉得到𠊎等特別个照顧；該兜無體面个部份，反轉得到𠊎等个關心；
24該兜較好看个部份，就無需要打扮。上帝就係恁樣安排𠊎等个身體，使該兜較媸个肢體反轉有較大个光榮；
25佢个目的係愛使身體毋會分裂，各肢體反轉會互相照顧。
26一個肢體受苦，所有个肢體就相共受苦；一個肢體得光榮，所有个肢體就相共快樂。
27你等就係基督个身體，每一個人係身體个肢體。
28在教會底背，上帝所安排个，第一係使徒，第二係先知，第三係教師；接下去係行神蹟个，有醫病恩賜个；還有幫助人个，管理事務个，並講屬靈語言个。
29毋係大家全部做使徒，做先知，抑係做教師；也毋係全部有能力行神蹟，
30醫病，講屬靈个語言，抑係解釋屬靈个語言。
31雖然係恁樣，你等愛迫切追求該兜較重要个恩賜。
接下去，𠊎愛指示你等至善个道路。
Who We AreWhat We EelieveWhat We Do
2025 by iamachristian.org,Inc All rights reserved.
