以西結書 19 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1上帝喊𠊎為以色列个眾王子做這首哀歌：

2若姆係獅乸，伏在歸群公獅中；

牠在少壯獅仔當中畜細獅仔。

3牠畜大一隻細獅仔成做少壯獅仔；

少壯獅仔學會打獵，學會食人。

4列國聽到，將牠拐入深坑；

佢等用鉤仔將牠拖到埃及。

5獅乸等到心著急絕望；

牠又另外畜大一隻細獅仔成做少壯獅仔。

6少壯獅仔跈等歸群獅仔逐所在走來走去；

牠也學會打獵，學會食人。

7牠破壞城堡 ，打壞城市；

牠大聲吼，全地个人驚到愊愊掣。

8列國對四面八方來圍牠；

佢等打開羅網，將牠拐入深坑。

9佢等用鉤仔將牠拖入籠仔，帶到巴比倫王該位；

佢等將牠關入監獄，以色列个群山無再聽到牠盡嘶个聲。

10若姆像一頭種在溪水滣个葡萄樹，

因為水豐富，枝葉拶拶，果子當結。

11它个樹桍盡硬，好做王个杖仔；

它个樹身高大，超過其他樹仔个枝葉；

它个樹尾高到堵天，遠遠就看得到。

12總係，有發譴个手將它連根挷起，

豁在地上，被東風吹燥，

樹桍拗斷，果子燥掉，被火燒淨淨。

13這下它被人種在曠野，

當燥無水个所在。

14樹梗𤏸火，樹桍㧯果子全部燒掉；

它卻無盡硬个樹桍，好做王个杖仔。

這係一首哀歌；這首哀歌一直流傳。