士師記 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1後來，在割麥仔个時節，參孫帶一隻細山羊去看佢个𡜵娘。參孫對厥丈人老講：「𠊎愛入間房去尋𠊎个𡜵娘。」

厥丈人老毋准佢入去，

2對佢講：「𠊎真知你當惱姖，所以將姖嫁給你个且郎了。姖个老妹比姖還較靚，你做得討姖！」

3 參孫講：「這擺𠊎有資格好好來修理非利士人！」

4參孫就捉三百隻狐狸來，將狐狸个尾一對一對結共下，結頭頂高插一支火把，

5然後點火，將狐狸放入非利士人个麥田肚。恁樣，佢將割好个㧯還吂割个麥仔全部燒掉，連葡萄園㧯橄欖園也燒掉。

6非利士人調查麼人放火，發現係參孫做个，因為厥丈人老 (亭拿人) 將佢个𡜵娘嫁給厥且郎。所以非利士人上去，放火燒該婦人家㧯姖个阿爸。

7 參孫對非利士人講：「你等既然敢恁樣做，𠊎發誓，若毋報這冤仇，𠊎絕對毋放你等煞！」

8參孫打到佢等慘慘，㓾死盡多人。後來佢到以坦，住在該位个石窿肚。

參孫打贏非利士人

9 非利士人到猶大，在該位安營，攻打利希城。

10猶大人問佢等：「你等做麼介上來攻打𠊎等呢？」

佢等講：「𠊎等來捉參孫；佢樣般對待𠊎等，𠊎等也愛樣般對待佢。」

11所以，有三千猶大人到以坦个石窿去尋參孫，對佢講：「敢講你毋知非利士人係統治𠊎等个？𠊎等會被你害死！」

參孫應講：「𠊎係照佢等對待𠊎个方式來對待佢等定定！」

12 猶大人㧯佢講：「𠊎等到這位來，愛將你捆起來，交給非利士人。」

參孫講：「你等愛㧯𠊎發誓，你等自家毋會㓾𠊎。」

13佢等講：「好，𠊎等單單將你捆起來，交給佢等；𠊎等毋會㓾你。」所以佢等用兩條新个索仔將參孫捆起來，帶佢出石窿。

14 參孫到利希，非利士人向佢走等去，對佢盡嘶。上主个靈強烈臨到佢；佢一用力，捆厥手个索仔就像麻索被火燒斷掉一樣。

15佢看到一支還吂燥个驢腮骨，就拈起來，用它㓾掉一千人。

16參孫做詩講：

𠊎用一支驢腮骨㓾掉一千人；

用一支驢腮骨使屍體堆歸堆 。

17佢講煞就將驢腮骨㧒掉。該地方就安到拉末‧利希

。

18後來，參孫非常嘴燥；佢懇求上主講：「你使你个僕人大贏敵人；這下你愛𠊎渴死、落在該兜無受割禮个人手中係麼？」

19上帝就使利希个低窩地裂開，湧出泉水。參孫啉水以後，精神恢復。所以，該泉水安到隱‧哈歌利

，到今晡日還在利希。

20非利士人統治以色列人个期間，參孫做以色列个士師二十年。