彌迦書 7 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

以色列人个腐敗

1情形實在當慘！𠊎像一個餓肚笥个人，對無花果樹頂尋毋到賸下來个果子，在葡萄園尋毋到留下來个葡萄。所有个葡萄㧯初熟个無花果全部被人摘淨淨。

2在這垤土地上，所有誠實正直个人全部死掉了；連一個對上帝忠心个人乜無。人人埋伏愛㓾人；儕儕愛鋪羅網害死自家个同胞。

3佢等全部係做壞事个專家；官員㧯法官全部討紅包、由在人收買。有權勢个人㧯佢等結黨派，壞事行盡。

4在佢等中間，就係最好心、最誠實个，也㧯竻仔共樣無麼介價值。

上帝審判佢个子民个日仔已經到了，這係佢以前識通過守望者 — 該兜先知向佢个子民警告个，這下佢等開始驚到無葛無煞。

5你等毋好相信鄰舍，也毋好信任朋友，連對自家个𡜵娘講話都愛小心。

6孻仔藐視阿爸；妹仔反對阿姆；心舅對抗家娘；你等个對敵就係自家屋下个人。

7論到𠊎，𠊎愛仰望上主；𠊎愛等候上帝 — 𠊎个救主。𠊎个上帝會聽𠊎个祈禱。

上主拯救佢个子民

8𠊎等个敵人毋使偷偷仔歡喜。雖然𠊎等跌倒了，𠊎等還愛企起來。這下𠊎等雖然在烏暗中，總係上主愛做𠊎等个光。

9𠊎等識得罪上主，所以，𠊎等這下一定愛忍受佢个大發譴。總係最尾，佢會代𠊎等辯護，為𠊎等伸冤。佢會帶𠊎等進入光明；𠊎等會親身看到佢个拯救。

10該時，𠊎等个敵人看到，一定會感覺見笑。佢等識問𠊎等：「上主 — 你等个上帝在㖠位？」𠊎等會親目看到佢等被人打橫，像街路上个泥糜由在人踐踏。

11 耶路撒冷人啊，重建城牆个時間會到了！該時，你等國家个土地會加盡大。

12你等个同胞愛對逐所在轉來。佢等對東方个亞述、南方个埃及、幼發拉底河个地區、大海該片、山嶺該片，全部趕轉來。

13總係，該兜所在愛變做荒地，因為該位个人民全部邪惡。

上主憐憫佢个子民

14上主啊，求你牧養你自家所選个子民！佢等孤孤單單住在樹林中，無好享受四周圍盡肥个牧場。求你俾佢等去巴珊㧯基列，像以前共樣，在豐富个草場得到牧養。

15上主啊，求你為𠊎等顯出神蹟，像以前你帶𠊎等出埃及个時共樣。

16雖然列國有強大个力量，總係佢等看到你个大能力就會嚇倒見笑，毋敢講、毋敢聽。

17佢等會像蛇哥舐泥、在地上趖；佢等會驚到爬出城堡，在上主 — 𠊎等个上帝面前愊愊掣。

18上帝啊，無其他个神㧯你比抑得；你赦免還賸个子民。你無永遠發譴；你歡喜用不變个慈愛款待𠊎等。

19你愛再一擺痛惜𠊎等。你愛將𠊎等个罪踏在腳下，㧹入海底。

20就像頭擺你應許𠊎等个祖先，你愛對亞伯拉罕㧯雅各个後代顯明信實㧯不變个慈愛。