撒母耳記下 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

大衛做以色列㧯猶大个王(歷代志上 11:1-9；14:1-7)

1 以色列所有支族全部到希伯崙來見大衛，對佢講：「𠊎等係你个骨肉之親。

2以前，當掃羅還做𠊎等个王，你就已經帶領𠊎等以色列人民出入戰場。上主識應許你講：『你愛做牧人領導𠊎个子民以色列，做佢等个統治者。』」

3所有以色列个長老全部到希伯崙見大衛王。大衛在上主面前㧯佢等立約，佢等就膏油設立佢做以色列个王。

4大衛做王个時三十歲，在位共四十年。

5佢在希伯崙統治猶大七年半，在耶路撒冷統治全以色列㧯猶大共三十三年。

6 大衛王㧯佢个軍隊準備愛攻打耶路撒冷。該地个耶布斯人認為大衛無可能征服這城，就對大衛講：「你永遠無法度進入這城，就連瞙目个㧯跛腳个也會將你逐走！」

7(總係大衛還係佔領佢等个錫安城堡；該就係後來有名个大衛城。)

8該日，大衛對佢个部下講：「麼人㧯𠊎共樣恁惱耶布斯人，愛攻打佢等，就愛對這水溝暗窿上去，攻打該兜瞙目个㧯跛腳个！」 (因為恁樣，有一句俗語講：「瞙目个㧯跛腳个做毋得入上主个殿 。」)

9佔領城堡以後，大衛就徙入去，又將它个名安到大衛城。大衛在這城堡个周圍起城牆 ，對山東片坉平个台地 開始起。

10大衛个王國一日比一日興旺，因為上主 — 萬軍个元帥上帝㧯佢共下。

11 泰爾王希蘭派使者到大衛該位去，帶等香柏樹、木匠㧯打石師傅，代大衛起王宮。

12大衛就知上主設立佢做以色列王个事已經完成了，也知上主係因為自家个子民使佢个王國興旺。

13 大衛離開希伯崙到耶路撒冷後，又討細姐，又𫱔子女。

14在耶路撒冷𫱔个有：沙母亞、朔罷、拿單、所羅門、

15益轄、以利書亞、尼斐、雅非亞、

16以利沙瑪、以利雅大、以利法列。

大衛打贏非利士人(歷代志上 14:8-17)

17 非利士人聽到大衛已經被人膏油立做以色列王，就派大軍隊來尋大衛。大衛一聽講，就到城堡去。

18非利士人來到利乏音山壢，佔領該地方。

19大衛求問上主：「𠊎應該去攻打非利士人麼？你會使𠊎打贏麼？」

上主應講：「去！𠊎一定會將非利士人交在你手中。」

20所以，大衛到巴力‧比拉心去，在該位打贏非利士人。佢講：「上主衝散𠊎个仇敵，像大水沖壞石壆。」所以該地方喊做巴力‧比拉心

。

21非利士人逃命个時將佢等个偶像㧒在該位，大衛㧯佢个部下就將它兜帶走。

22無幾久，非利士人又轉到利乏音山壢來，佔領該地方。

23大衛又求問上主；上主講：「毋好對這位攻打佢等，愛𫟧到佢等後背，對桑仔樹樹林該片來攻打。

24你一聽到桑仔樹尾頂有腳步聲，就遽遽進攻，因為𠊎 — 上主已經行到你頭前去攻打非利士人个軍隊。」

25大衛就照上主个命令去做。結果，佢將非利士人打退，對迦巴逐到基色。