1 以利戶繼續講：
2請你耐心聽𠊎解釋；
𠊎愛為上帝講加兜。
3𠊎所知个範圍當闊，愛拿來引用；
𠊎愛說明𠊎个創造主係公正个。
4𠊎所講个話正經毋係歕雞頦；
在你面前个係大有智慧个人。
5看啊！上帝大有能力，
總係佢毋會藐視人；
佢个心思非常精明。
6佢無愛由在壞人生下去；
佢愛為窮苦人伸張正義。
7佢看顧正直人，又設立佢等坐大位；
就像君王恁樣，佢等永遠受人尊敬。
8人若係被鍊仔捆等，
被苦難个索仔䌈等，
9上帝愛指出佢等所犯个罪惡，
使佢等知自家个驕傲㧯自大。
10佢使佢等个耳公聽到警告，
吩咐佢等離開邪惡个道路。
11若係佢等順服上帝，事奉佢，
佢等就能享受平安个日仔，
佢等个人生也會滿有幸福。
12若無順服，佢等會無智無識，
然後就經過死河、進入陰間。
13毋敬畏上帝个人受到上帝責罰；
佢等緊想緊譴，總係毋求佢幫助。
14佢等盡後生就死掉，
生命在污穢 中喪掉。
15總係，上帝用苦難來救苦難中个人，
用災難使人个耳公聽得入佢个話。
16上帝對災難中引帶你出來，
使你進入當闊當平安个地，
使你桌席擺滿滿、十分滂沛。
17這下你堵到壞人个報應；
你已經受到公義个審判。
18愛細膩，毋好被人个財寶引誘；
也毋好被人貼後手受到拐騙 。
19你个財富 對災難有麼介用？
你所有个勢力敢會幫助你？
20毋使盼望該暗晡來到；
毋使緊等眾人會消滅。
21細膩噢，毋好向邪惡行等去；
你个苦難警告你愛離開它。
22愛記得上帝个權力有幾大；
敢有像佢恁偉大个指導者？
23麼人做得指定佢愛做麼介？
麼人能責備佢講：「你做毋著」？
24佢所做个永遠受到頌讚；
你也毋好毋記得讚美佢。
25萬民看到佢个所做；
世人對當遠來查看 。
26上帝有幾偉大，𠊎等無法度了解；
𠊎等也算毋出佢到底有幾多歲。
27上帝對地上吸收水氣，
將它變做雲肚个雨水。
28雨點對雲落下，
就滋潤全人類。
29麼人明白上帝樣般散佈雲彩？
樣般對佢住个行宮發出雷聲？
30佢用𥍉爧照天空，
用海水遮蓋海底。
31佢就係恁樣治理萬民，
又賜佢等豐富个食物。
32佢親手掌管𥍉爧，
命令它去打目標。
33佢打雷公表示會落大雨，
連頭牲乜清楚知愛閃開。
Who We AreWhat We EelieveWhat We Do
2025 by iamachristian.org,Inc All rights reserved.
