撒迦利亞書 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

測量索个異象

1在另外一個異象中，𠊎看到一個人，手拿等一條測量索。

2𠊎問佢：「你愛去㖠位？」

佢講：「𠊎愛去量耶路撒冷，看它有幾長、幾闊。」

3㧯𠊎講話个天使行出去个時節，另外一個天使迎接佢。

4頭一個天使對第二個天使講：「遽遽走去㧯該拿等測量索个青年講：『耶路撒冷會有盡多人㧯頭牲來住；它會像一個無城牆个城。

5上主已經答應，佢愛成做一座火牆，圍等這城，保護它，也愛做它當中个榮光。』」

呼召人民轉故鄉來

6-7上主對佢个人民講：「𠊎識將你等分散到四面八方去。總係你這兜流亡个人啊，愛遽遽脫離巴比倫，轉耶路撒冷來。

8麼人攻擊你等，就係攻擊到𠊎个目珠仁。」

所以，榮光个上主 — 萬軍个元帥差派𠊎將以下个信息㧯該兜搶佢人民个國家講：

9「看啊，𠊎 — 上主愛親自攻擊你等；以前服事過你等个人愛搶劫你等。」

該時節，你等就會知上主 — 萬軍个元帥差派𠊎。

10上主講：「錫安个人民啊，愛歡喜唱歌！因為𠊎愛來住在你等當中。」

11該時，盡多國家愛歸向上主，成做佢个人民。佢愛住在你等當中，你等就會知上主 — 萬軍个元帥差派𠊎到你等該位去。

12猶大愛重新做屬上主个聖地；佢愛再一擺揀選耶路撒冷做聖城。

13全人類應該在上主面前恭敬恬靜，因為上主對佢个聖所出來！