約伯記 32 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

後生人以利戶講个話(32:1–37:24)

1因為約伯堅持自家無罪，這三個人就無再應佢。

2總係有一個人在塍頭，佢安到以利戶 (以利戶係布西後代蘭族人巴拉迦个孻仔)；因為約伯認為自家無罪又怪怨上帝，佢忍毋住就向約伯發譴。

3佢也向約伯个三個朋友發譴，認為佢等毋知愛樣般回答約伯，硬講約伯毋著 。

4因為以利戶比佢等後生，毋敢搶等㧯約伯講話；

5看到佢等三儕無話好應約伯，就當閼。

6所以，以利戶就講：

𠊎最後生，你等係長輩；

本來𠊎毋敢講吾意見。

7𠊎想，𠊎應該愛讓長輩講話，

俾年老个傳授佢等个智慧。

8其實，只有全能上帝个靈

正能將智慧賜給世間人。

9年紀大無一定就較有智慧；

較多歲也無一定明白是非。

10所以，𠊎請你等聽𠊎講；

𠊎也愛講𠊎个意見。

11你等个談論𠊎全部認真聽，

緊等你等會講出明智个話。

12𠊎注意聽你等个話，

發現你等全部失敗；

連一儕都拗約伯毋贏。

13你等樣般做得講，已經尋到智慧呢？

上帝正有辦法說服約伯，人做毋到。

14 約伯毋係向𠊎爭論；

𠊎乜毋會像你等恁樣應佢。

15 約伯啊，佢等對你無話好應；

佢等無辦法給你麼介答案。

16佢等企在該位，已經無麼介話好講了；

佢等恬恬毋講話，𠊎還愛等等下去嗎？

17做毋得，𠊎這下愛回答你；

𠊎愛將𠊎个想法㧯你講。

18𠊎有當多話一定愛講，

𠊎个心迫𠊎愛講出來。

19若係𠊎毋尋機會將話講出來，

𠊎會像裝滿新酒个皮袋爆掉。

20𠊎忍毋住愛講話；

𠊎一定愛拚出來。

21𠊎在你等个辯論中，

毋會偏心、巴結麼人。

22𠊎毋知愛樣般奉承人；

若係𠊎恁樣做，創造主一定會黏時責罰𠊎。