馬太 6 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

論救濟

1「你等愛細膩，毋好在別人面前展自家个虔誠，佻佻做給人看。恁樣做，你等就毋使想愛對天父該位得到麼介獎賞。

2「所以，你救濟人个時，毋好歕喇叭宣傳，像該兜假好个人在會堂抑係街項所做个，愛得到別人个誇獎。𠊎實在㧯你等講，佢等恁樣做，已經得到佢等个報答了。

3你救濟人个時，右手所做个，莫給左手知，

4愛在暗中行善。恁樣，你个天父，就係看得到你在暗中做事个，佢的確會獎賞你。

論祈禱(路加 11:2-4)

5「你等祈禱个時節，毋好像假好个人恁樣，好企在會堂抑係十字路口祈禱，佻佻做給人看。𠊎實在㧯你等講，佢等恁樣做，已經得到佢等个報答了。

6你祈禱个時，愛入自家个間肚，關等門，向暗中个天父祈禱。恁樣，你个天父，就係看得到你在暗中做事个，佢的確會獎賞你。

7「你等祈禱个時，毋好像異教徒恁樣用盡多重複無意思个話。佢等恅到用長篇大論，上帝正會聽。

8毋好像佢等恁樣；你等吂求，你等个天父已經知你等所需要个。

9所以，你等愛恁樣祈禱：

𠊎等在天頂个阿爸：

願你个聖名受尊重；

10願你在世間掌權；

願你个旨意實現在地上，

就像在天頂一樣。

11賜𠊎等今晡日 所需要个飲食。

12饒赦𠊎等个虧欠，

就像𠊎等饒赦虧欠𠊎等个人 。

13毋好俾𠊎等堵到忒重个考驗；

救𠊎等脫離該邪惡者个手 。

14「你等赦免別人个過犯，你等个天父也會赦免你等；

15你等毋赦免別人个過犯，你等个天父也毋會赦免你等个過犯。

論禁食

16「你等禁食个時節，毋好像假好个人；佢等詐意憂愁，面裝到盡媸，佻佻俾人看出佢等當在禁食。𠊎實在㧯你等講，佢等恁樣做，已經得到佢等个報答了。

17你禁食个時，愛梳頭洗面，

18莫給別人看出你在禁食；在暗中个天父看到就罅了！恁樣，你个天父，就係看得到你在暗中做事个，佢的確會獎賞你。

論天頂个財寶(路加 12:33-34)

19「毋好為自家積存財寶在地上；因為有蟲仔來蛀，也會生鹵，又有賊仔打壞門入來偷。

20愛為自家積存財寶在天頂；該位無蟲仔來蛀，毋會生鹵，也無賊仔打壞門入來偷。

21因為你个財寶在㖠位，你个心也在該位。

身體个光(路加 11:34-36)

22「目珠可比身體个燈。目珠若係好，你全身就會有光明；

23目珠若壞掉，你全身就會烏暗。共樣，你底背个光若係變做烏暗，該種个烏暗係樣般得人驚啊！

上帝㧯財物(路加 16:13；12:22-31)

24「無人能服事兩個主人。毋係惱這個、愛該個，就係看重這個、看輕該個。你等無可能同時做上帝个僕人，又做金錢个奴才。

25「所以，𠊎㧯你等講，毋好為到生活所需要个飲食，抑係身體所愛著个衫褲來操心。生命敢無比飲食較重要？身體敢無比衫褲較要緊？

26你等看天頂个鳥仔：牠兜無種，無收，也無將糧食囤在榖倉；你等在天頂个阿爸還係畜牠兜！你等敢毋係比鳥仔較貴重嗎？

27你等當中麼人能用憂愁食加幾日 呢？

28「樣愛為到衫褲來操心？你等看野生个百合花樣般靚起來！它兜無做事，也無做衫；

29總係𠊎㧯你等講，就係所羅門極榮華富貴个時，佢个打扮也無一蕊野花恁靚。

30野生个花草今晡日生出來，天光日就燥掉，被人㧒落火爐去燒，上帝還恁樣為它兜打扮，佢敢毋會將衫褲賜給你等？你等个信心實在忒細！

31所以，毋好憂愁講：『𠊎等愛食麼介？愛啉麼介？愛著麼介？』

32這兜事係毋信个人所追求个。你等天頂个阿爸知這兜全部係你等所需要个。

33你等愛先追求上帝國个實現，並遵行佢个旨意，佢就會將這一切全部賜給你等。

34總講，你等毋好為到天光日來憂愁，因為天光日有天光日个憂愁；一日擔當一日个艱苦就罅了。」