1上主對摩西講：
2「你愛㧯亞倫講，佢安七盞燈在燈臺頂个時，愛將燈光向頭前照。」
3亞倫就照恁樣辦理，將燈向燈臺頭前个方向來安，係照上主所吩咐摩西个。
4這個燈臺，對頂高到底下，全部係用金仔打出來个，係照上主指示摩西个樣式打造个。
為利未人行潔淨禮㧯奉獻禮5上主對摩西講：
6「你愛將利未人㧯其他个以色列人分開，
7用以下个方法潔淨佢等：用淨浰个水拂在佢等个身上，喊佢等將全身用剃頭刀剃淨，將衫褲洗淨；恁樣，佢等在禮儀上就算淨浰了。
8佢等愛牽一隻細牛牯㧯一定愛獻个素祭，就係攪橄欖油个幼麵粉；你還愛牽另外一隻細牛牯，來做贖罪祭。
9然後你愛召集以色列全會眾，喊利未人企在聖帳篷頭前、𠊎 — 上主个面前。
10以色列人愛將佢等个手放在利未人个頭那頂；
11亞倫愛將利未人獻給𠊎當做搖祭，係以色列人特別个禮物。恁樣，佢等正做得辦理𠊎个事。
12利未人愛按手在該兩隻牛牯个頭那頂；一隻做贖罪祭，一隻做燒化祭，獻給𠊎，為利未人贖罪。
13「你愛將利未人做特別个禮物獻給𠊎，又愛喊亞倫㧯佢該兜孻仔管理佢等。
14你愛恁樣將利未人㧯其他个以色列人分開，使佢等歸屬𠊎。
15你將利未人潔淨並奉獻以後，佢等就做得在聖帳篷底背工作。
16𠊎已經宣佈，佢等愛代以色列長子个地位；佢等愛完全歸屬𠊎。
17𠊎在埃及打死所有个頭胎該日，已經將以色列人逐家个長子㧯逐隻頭牲个頭胎分別為聖，歸屬𠊎。
18𠊎這下愛將利未人代所有以色列人个長子。
19𠊎對以色列人當中將利未人當做禮物賜給亞倫㧯佢該兜孻仔，在聖帳篷底背為以色列人工作又為佢等行贖罪禮，免得以色列人行到聖所面前堵到災難。」
20 摩西、亞倫、㧯以色列全會眾就遵照上主命令摩西个話，將利未人奉獻。
21利未人潔淨自家，洗淨佢等个衫褲；亞倫將佢等當做搖祭係特別个禮物獻給上主，也為佢等行贖罪禮來潔淨佢等。
22有關利未人个事，人民全部遵照上主命令摩西个話來行。恁樣，利未人就在亞倫㧯佢該兜孻仔个指揮下，執行聖帳篷底背个任務。
23上主對摩西講：
24「逐個二十五歲以上个利未人愛在聖帳篷事奉，
25總係到五十歲个時愛退休。
26以後佢做得在聖帳篷幫助同事，總係做毋得自家單獨辦事。你愛恁樣分配利未人个工作。」
Who We AreWhat We EelieveWhat We Do
2025 by iamachristian.org,Inc All rights reserved.
