詩篇 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

祈求庇佑 大衛个詩，交給聖歌隊長，吹簫來和。

1上主啊，求你聽𠊎个話；

求你留意聽𠊎个歎息。

2𠊎个王，𠊎个上帝啊，

留心聽𠊎求喊个聲；

因為𠊎係向你祈禱！

3上主啊，天曚光你聽到𠊎个聲；

打早𠊎就對你懇求 ，等候你。

4你係無歡喜罪惡个上帝；

你不准邪惡人同你共下。

5驕傲个人，在你眼前企毋住；

所有作惡个人，你怨恨佢等。

6講花撩个，你一定會毀滅佢等；

好流人血㧯詭詐个，上主當惱佢等。

7總係𠊎，因為你豐盛个慈愛，

𠊎做得入去你个聖所；

𠊎愛恭恭敬敬伏等，

在你个聖殿敬拜你。

8上主啊，因為𠊎个對敵看等𠊎，

求你帶領𠊎，俾𠊎實行你个旨意，

俾𠊎直直行你為𠊎安排个道路。

9仇敵个話全部係信毋得个；

佢等个心所想个只有毀滅。

佢等个喉嗹像打開个墳墓，

嘴甜舌滑，專門講詭詐个話。

10上帝啊，求你定佢等个罪，

使佢等中到自家个詭計。

求你對你面前將佢等逐走，

因為佢等悖逆你，罪惡滿滿。

11願得到你庇佑个人全部快樂，

願佢等一直歡喜來吟詩唱歌。

求你保護該兜敬愛你个人，

使佢等歡喜頌讚你。

12上主啊，你定著會賜福給正義个人；

你个憐憫像盾牌會四面保佑佢等。