1孻仔啊，毋好毋記得𠊎个教示；
你愛時時想起𠊎教你个誡命。
2它兜會使你享受長壽，
四季平安。
3毋好俾忠誠、信實離開你；
愛將這兜䌈在頸項，刻在心版。
4恁樣，你在上帝㧯人面前
就會得到歡喜㧯好名聲。
5你愛專心來信靠上主，
毋好倚靠自家个聰明。
6你行事做人全部愛仰望主，
佢就會指示你行正直个路。
7毋好恅到自家有智慧；
愛敬畏上主，遠離邪惡。
8恁樣做，就會醫治你个身體，
滋養你个筋骨。
9你愛用財產㧯田園最好个出產
獻給上主，表示對佢个尊敬；
10恁樣，你个倉庫就會充滿五榖，
酒桶裝个新酒會多到淰出來。
11孻仔啊，毋好看輕上主个管教，
也毋好惱佢个責備；
12因為上主管教佢所痛惜个人，
就像阿爸管教所歡喜个子女。
智慧个價值13尋到智慧、得到聰明个，
這兜人實在有福氣噢！
14智慧比買賣賺到个銀仔較有價值，
比黃金所生个利息較多好處。
15智慧比珠寶還較寶貝；
你所合意个無一項㧯姖比抑得。
16智慧个右手有長壽，
左手有富貴㧯尊榮。
17智慧使你生活快樂，
帶領你行平安个路。
18對謹守姖个人，姖像生命樹；
留得姖住个人，就會有福氣。
19上主用智慧固定大地；
佢識用聰明安設天空。
20佢用智識使深淵湧出大水，
使烏雲降下甘霖。
21孻仔啊，愛謹守真智慧㧯見識，
毋好俾姖等離開你个面前；
22姖等會俾你个生命得到元氣，
也成做你頸項个寶貝。
23你就會行平安个路，
你个腳也毋會跌倒。
24你會安心睡目，
一覺睡到天光。
25你毋使驚忽然間來到个災難，
也毋使愁該臨到壞人个災禍；
26因為上主係你所倚靠个；
佢毋會俾你跌落羅網中。
27愛盡力幫助需要幫助个人；
你若有力量，毋好推辭行善。
28你這下有力量幫助鄰舍，就毋好對佢講：
「轉去，天光日正來，𠊎就會給你。」
29鄰舍在你附近安居，
就毋好設計來害佢。
30別人毋識傷害你，
莫無故㧯佢相爭。
31毋好欣慕強暴个人，
毋好跈佢所行个路；
32因為上主盡惱橫行个人，
總係佢親近正直个人。
33上主咒詛邪惡人个家庭；
佢賜福給正直人个屋下。
34佢嘲謔該兜嘲謔別人个，
總係賜恩典給謙卑个人。
35智慧人會得到好名聲；
總係戇檔人加添見笑。
Who We AreWhat We EelieveWhat We Do
2025 by iamachristian.org,Inc All rights reserved.
