1「你等若係看到以色列同胞个牛羊尋毋到路，做毋得毋插牠；愛將牠牽轉去交還主人。
2若係牠个主人離開你等當遠，抑係你等毋知牠个主人係麼人，就將牠牽轉屋下，等牠个主人來尋个時正還佢。
3你等若係尋到以色列同胞毋見掉个驢仔、跌掉个衫褲抑係所有其他个東西，全部愛共樣處理，做毋得毋插。
4「你等若係看到以色列同胞个驢仔抑係牛仔在路項跢倒，做毋得毋插牠；愛幫助主人將頭牲拉起來。
5「婦女做毋得著男人个衫褲；男人也做毋得著婦女个衫褲；因為上主 — 你等个上帝盡惱恁樣打扮个人。
6「你等若係發現樹頂抑係地上个鳥藪，藪肚有鳥乸在孵卵抑係㧯鳥子共下，做毋得將鳥乸捉走。
7你等做得捉鳥子走，總係愛放鳥乸走。恁樣，你等就會凡事順利，享受長壽。
8「起新屋个時，屋頂四面愛圍欄杆。恁樣，若有人跢死，你等就毋使承擔流人血个債。
9「做毋得在葡萄園肚種別个農作物；免得你等食毋到園中出產个葡萄抑係別个產物。
10「做毋得用牛仔㧯驢仔共下犁田。
11「做毋得著羊毛㧯細麻紗共下刺个衫褲。
12「外衫个四角愛攣繸仔。」
有關貞潔个條例13「有人結婚，後來毋惜佢个𡜵娘，
14損害姖个名聲，講姖在新婚夜已經毋係童貞女。
15若係有這種糾紛，細妹仔个爺𡟓愛到城門口見該兜長老，拿出證據，證明妹仔確實係童貞女。
16細妹仔个阿爸愛對該兜長老講：『𠊎將吾妹仔嫁給這個人，這下佢毋惜姖，
17亂講姖無守婚前童貞。其實，𠊎這位有證據做得證明姖係童貞女。』爺𡟓就愛將新婚夜用个床單擺在城肚該兜長老面前。
18該城該兜長老就一定愛將這個老公捉起來刑罰，
19也愛罰佢一百隻銀幣，將錢交給細妹仔个阿爸，因為佢侮辱以色列个童貞女。以後，這細妹仔還係佢个𡜵娘；佢一生人做毋得㧯這細妹仔離婚。
20「若係這個老公所講个係事實，無證據好證明細妹仔係童貞女，
21城肚該兜長老就一定愛帶細妹仔到外家門口，本城个男人愛用石頭㧹死姖；因為姖在以色列中做見笑个事，在父家還吂出嫁就犯姦淫。恁樣，你等就除掉你等當中這種壞事。
22「若係有人㧯別人个𡜵娘通姦，被人捉到，兩儕全部應該處死，恁樣，你等就除掉以色列中這種壞事。
23「若係有人在城肚㧯別人个未婚妻通姦，
24你等一定愛帶兩儕到城門口，用石頭㧹死。該細妹仔該死，因為姖雖然在城肚，總係無出聲喊救命；該男人該死，因為佢㧯別人个未婚妻通姦。恁樣，你等就除掉你等當中這種壞事。
25「若係有人在野外強姦別人个未婚妻，只有該男人該死。
26你等做毋得傷害該細妹仔；姖並無該死个罪。這種案件㧯人被人謀殺共樣。
27該男人在野外強姦該未婚妻，細妹仔喊救命，也無人來救姖。
28「若係有人強姦還吂定親个童貞女，兩儕被人捉到，
29該男人一定愛付給細妹仔个阿爸五十隻銀幣做聘金；因為佢強姦姖，就愛討姖做𡜵娘，一生人做毋得㧯姖離婚。
30「人做毋得㧯佢个後𡟓結婚，做毋得侮辱自家个阿爸。」
Who We AreWhat We EelieveWhat We Do
2025 by iamachristian.org,Inc All rights reserved.
