詩篇 21 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

歌頌勝利 大衛个詩，交給聖歌隊長。

1上主啊，王因為你賜个力量歡喜；

佢因為你所賜个勝利非常快樂。

2佢个心願，你為佢成全；

嘴所求个，你也答應佢。

3你賜給佢極大个幸福接待佢，

又將金冕旒戴在佢个頭那頂。

4佢對你求壽年，你就賜給佢；

你使佢長壽，延到永永遠遠。

5佢因為你所賜个勝利滿有榮光；

你又將尊榮㧯威嚴加給佢。

6你賜佢个大福氣無窮無盡；

你㧯佢同在使佢充滿快樂。

7因為王有信靠上主；

通過至高者个慈愛，

佢个王權毋會搖動。

8你愛出手對付你一切个仇敵；

你个右手愛捉該兜恨你个人。

9你一出現，愛使佢等像落在火爐底背。

上主愛大發譴來吞滅佢等；

烈火愛將佢等燒到淨淨。

10你愛對地上滅盡佢等个子孫；

你愛對人間㓾掉佢等个後代。

11就算仇敵設詭計愛對付你，

佢等个陰謀也無可能成功。

12你一拉弓對準佢等个頭那，

佢等就會轉身走到淨淨。

13上主啊，願你顯明你个力量！

𠊎等愛吟詩歌頌你个權能。