1 以色列王耶羅波安在位个第十八年，亞比雅做猶大王。
2佢在耶路撒冷統治三年。厥姆安到瑪迦，係基比亞人烏列个妹仔。
亞比雅㧯耶羅波安戰爭；
3亞比雅帶領四十萬軍隊㧯耶羅波安个八十萬大軍相㓾。
4兩軍在以法蓮山區擺陣。亞比雅王上洗瑪面山向耶羅波安㧯以色列人喊講：「你等聽𠊎講！
5敢講你等毋知上主 — 以色列个上帝識㧯大衛立毋會廢掉个約係麼？上主將以色列个王位永遠賜給大衛㧯佢个後代。
6尼八个孻仔耶羅波安悖逆佢个王 — 大衛个孻仔所羅門，
7後來，佢召集一群無下落个鱸鰻，硬硬來欺負所羅門个孻仔羅波安；該時羅波安還後生，無經驗好抵擋佢等。
8這下你等想愛反抗上主賜給大衛後代个王權；你等有強大个軍隊，又用耶羅波安鑄造个金牛做你等个神。
9你等將上主个祭司亞倫个後代逐走，也將利未人逐走；你等照其他國家个方法指派祭司代佢等。若有人牽來一隻牛牯抑係七隻綿羊，你等就封立佢做祭司，服事虛假个神明。
10「總係，𠊎等還係事奉上主 — 𠊎等个上帝，無離開佢。亞倫个後代仍然執行祭司个職務；利未人協助佢等。
11佢等逐日早暗向上主燒香，獻燒化祭，又在純金个桌頂獻供餅；逐暗晡也點𤏸金燈臺頂个燈。𠊎等照上主 — 𠊎等上帝个命令做，總係你等離開佢。
12上帝㧯𠊎等共下，係領導𠊎等个；佢个祭司在這位，愛歕喇叭召集𠊎等㧯你等相㓾。以色列人哪，毋好㧯上主 — 你等祖先个上帝相㓾！你等係無法度打贏个！」
13這時，耶羅波安派一部份軍隊在猶大軍隊个後背埋伏，其他个就對頭前攻打。
14猶大人斡頭看，看到自家受包圍，就求喊上主；該兜祭司歕喇叭。
15猶大人大聲嘶；亞比雅就帶領佢等攻擊。上帝打贏耶羅波安㧯以色列軍隊。
16以色列人在猶大人面前逃走；上帝使猶大人贏過佢等。
17亞比雅㧯佢个軍隊大大打贏以色列人，消滅以色列个精兵五十萬。
18該時，猶大人打贏了，因為佢等偎靠上主 — 佢等祖先个上帝。
19 亞比雅逐耶羅波安个軍隊，佔領佢个幾座城，就係伯特利、耶沙拿、以弗崙，㧯這兜城附近个村莊。
20亞比雅在位期間，耶羅波安一直無再掌權。後來上主擊打佢，佢就死掉。
21 亞比雅漸漸強盛；佢有十四個𡜵娘，二十二個孻仔，十六個妹仔。
22有關亞比雅其他个事㧯言行全部記在《先知易多史》底背。
Who We AreWhat We EelieveWhat We Do
2025 by iamachristian.org,Inc All rights reserved.
