何西阿書 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1「祭司啊，你等愛聽！以色列人啊，你等愛注意！王親國族啊，你等也愛側耳來聽！這下你等愛受審判了；因為你等已經成做安在米斯巴个機關，揜在他泊山个羅網，

2挖在什亭深深个陷阱 。𠊎一定愛責罰你等大家。

3𠊎當了解以色列人；佢等瞞毋到𠊎。佢等這下行姦淫，對𠊎無忠心，無資格敬拜𠊎。」

何西阿警告拜偶像个人

4 以色列人个壞行為害佢等無法度歸向上帝。淫亂个心靈害佢等拜偶像，恁樣就毋認識上主。

5以色列人个驕傲成做佢等犯罪个證據。佢等个罪惡害佢等跌倒；猶大人也跈等佢等跌倒。

6佢等向上主獻牛羊，總係這對佢等無麼介好處。佢等尋毋到上主，因為上主已經離開佢等。

7佢等對上主當無誠實；佢等所𫱔个係私生子。所以，到月初，佢等㧯佢等个土地會被人吞滅。

猶大國㧯以色列國个戰爭

8你等愛在基比亞歕羊角，在拉瑪發出警報，在伯‧亞文

大聲喊。便雅憫人啊，你等个仇敵在你後背了！

9責罰个日仔到了；以色列愛滅亡了。以色列人啊，這事一定會發生。

10上主講：「𠊎愛向猶大个領袖發譴，像做大水恁樣責罰佢等，因為佢等侵佔以色列个土地。

11以色列被人欺負，受盡痛苦，失掉𠊎所賜个土地，因為姖一擺又一擺向該無麼介用个 鄰國求幫助。

12所以，𠊎愛毀壞以色列，像被蟲蛀掉一樣，也愛消滅猶大，像歿掉个樹頭！

13「當以色列發覺自家个病恁嚴重，猶大看到自家个傷恁厲害，以色列人就去見亞述个大王，求佢幫助；總係佢無法度醫好佢等，也無法度包佢等个傷口。

14𠊎愛像獅仔攻擊以色列人，像當惡个獅仔扯裂猶大人。𠊎愛親自扯爛佢等，將佢等拖走，無人有可能救佢等。

15「𠊎愛離開𠊎个子民，等佢等承認自家有罪，轉到𠊎面前來；在患難中，佢等就會迫切尋求𠊎。」