1 大衛年老个時，設立佢个孻仔所羅門做以色列个王。
利未人个職務2 大衛王召集以色列所有个領袖、祭司、㧯利未人。
3佢調查利未人三十歲以上个男人，總數有三萬八千儕。
4王派兩萬四千儕管理上主聖殿个工作，六千儕保管記錄㧯決裁相爭个事，
5四千儕做守衛个工作，四千儕擔任頌讚上主个事，彈奏王所供應个樂器。
6 大衛照利未人所屬个宗族將佢等分做革順、哥轄，㧯米拉利三組。
7 革順有兩個孻仔 — 拉但㧯示每。
8 拉但有三個孻仔 — 耶歇、細坦、約珥。
9佢等全部係拉但後代逐宗族个族長。
(示每有三個孻仔 — 示羅密、哈薛、哈蘭
。)10 示每有四個孻仔，照大細个順序係：雅哈、細拿、耶烏斯、比利亞。
11耶烏斯㧯比利亞个後代無盡多，所以合共下算一個宗族。
12 哥轄有四個孻仔 — 暗蘭、以斯哈、希伯倫、烏薛。
13佢个長子暗蘭係亞倫㧯摩西个阿爸。 (亞倫㧯佢个後代受選派永遠管理聖物，負責燒香敬拜上主，事奉佢，並奉佢个名祝福人民。
14總係神人摩西該兜孻仔歸在利未支族。)
15 摩西有兩個孻仔 — 革舜㧯以利以謝。
16 革舜个長子係細布業。
17 以利以謝只有一個孻仔利哈比雅；總係利哈比雅有盡多後代。
18 哥轄第二個孻仔以斯哈有一個孻仔，安到示羅密，係這宗族个族長。
19 哥轄第三個孻仔希伯倫有四個孻仔，照大細个順序係：耶利雅、亞瑪利亞、雅哈悉、耶加面。
20 哥轄第四個孻仔烏薛有兩個孻仔 — 米迦㧯耶西雅。
21 米拉利有兩個孻仔 — 抹利㧯母示。
抹利也有兩個孻仔 — 以利亞撒㧯基士。
22以利亞撒死个時無孻仔，只有妹仔。厥幾個妹仔嫁給姖等个叔伯兄弟，就係基士該兜孻仔。
23 米拉利第二個孻仔母示有三個孻仔 — 末力、以得、耶利摩。
24以上係利未个後代，係用宗族㧯家族做單位，逐儕全部照名仔來登記。所有二十歲以上个人，全部有份在上主聖殿个工作。
25 大衛講：「上主 — 以色列个上帝賜平安給佢个子民；佢自家愛永遠住在耶路撒冷。
26所以，利未人毋使再扛上主个聖帳篷㧯其他禮拜用个東西。」
27照大衛臨終个指示，所有滿二十歲个利未人全部愛登記，
28受派擔任以下个職務：協助亞倫後代做祭司个人主持上主聖殿中禮拜个事，管理上帝聖殿个庭院㧯房間，負責清潔聖物；
29負責預備獻給上帝个供餅、獻祭个麵粉、無酵餅、焙个祭物、㧯攪橄欖油个麵粉，也愛秤、量聖殿个祭物。
30佢等逐日早暗還愛企等感謝讚美上主；
31堵到安息日、初一，抑係其他節日，愛照指定个數目㧯例規常常獻燒化祭給上主。
32利未人負責管理上主个聖帳篷㧯聖殿，也協助佢等个親族 — 亞倫後代主持聖殿禮拜个事。
Who We AreWhat We EelieveWhat We Do
2025 by iamachristian.org,Inc All rights reserved.
