1主啊，你世世代代
係𠊎等个歸宿。
2群山吂有受創造，
你還吂使大地㧯世界成形，
對上古直到永遠，
你係上帝。
3你使人歸於塵土，又講：
「你等世間人愛轉去。」
4在你看來，千年如一日，
就像已經過去个昨晡日，
又像暗晡時个一更。
5你使人像被大水打走一樣；
佢等个生命像發夢恁短。
佢等像朝晨頭發芽生出來个草，
6朝晨頭生長開花，
暗晡時枯燥死掉。
7𠊎等被你个發譴所消滅；
𠊎等因為你个大發譴就著驚。
8你將𠊎等个罪惡擺在你面前，
將𠊎等囥等个罪過顯明出來。
9𠊎等个壽命因為你个發譴就縮短；
𠊎等个生命像透一口大氣就過掉。
10𠊎等个一生只有七十歲，
若係勇健可能到八十歲；
總係所誇口个不過係勞苦愁煩；
轉眼成空，就像雲霧飛走。
11麼人會明白你發譴个力量？
麼人會知你个大發譴係樣般得人驚？
12求你教𠊎等計算自家个年日，
好使𠊎等得到智慧个心。
13上主啊，求你回心轉意！
你愛發譴到幾時呢？
求你憐憫你个僕人。
14逐朝晨，求你用你不變个慈愛滿足𠊎等，
給𠊎等一生人歡喜快樂。
15你使𠊎等一生堵到幾多个苦難，
求你也給𠊎等享受到幾多快樂。
16願你个僕人看到你大能个作為，
俾𠊎等个子孫也看到你榮光个權能。
17主 — 𠊎等个上帝啊，求你賜福給𠊎等！
求你使𠊎等所有个工作順利！
求你使𠊎等所做个一切成功！
Who We AreWhat We EelieveWhat We Do
2025 by iamachristian.org,Inc All rights reserved.
