1 以色列帶等佢所有个一切來到別是巴；佢在該位向厥爸以撒个上帝獻祭。
2該暗晡，在異象中上帝㧯以色列講話。上帝喊佢：「雅各！雅各！」
佢應講：「𠊎在這位！」
3上帝講：「𠊎係上帝，係若爸个上帝。你毋使驚！做你去埃及，因為𠊎愛俾你个後代在該位成做大國。
4𠊎愛㧯你共下到埃及去，也愛帶你个後代轉來這地方。你過身个時，約瑟會在你身邊服事。」
5 雅各對別是巴出發。以色列該兜孻仔使佢等个阿爸雅各㧯佢等个𡜵娘、子女全部坐在埃及王為雅各派來个車頂。
6佢等又帶等在迦南所得到个頭牲㧯財產到埃及去。恁樣，雅各帶領所有个子孫去到埃及，
7佢个孻仔、妹仔、孫仔、孫女，所有个後代攏總共下去。
8㧯雅各共下到埃及个以色列人，名單在下背：
雅各个長子呂便。
9 呂便个孻仔：
哈諾、法路、希斯崙、迦米。
10 西緬㧯佢个孻仔：
耶母利、雅憫、阿轄、雅斤、瑣轄，㧯迦南女子𫱔个少羅。
11 利未㧯佢个孻仔：
革舜、哥轄、米拉利。
12 猶大㧯佢个孻仔：
示拉、法勒斯、謝拉。
(猶大另外有兩個孻仔珥㧯俄南死在迦南。)
法勒斯个孻仔係 希斯崙㧯哈母勒。
13 以薩迦㧯佢个孻仔：
陀拉、普瓦、約伯、伸崙。
14 西布倫㧯佢个孻仔：
西烈、以倫、雅利。
15以上係麗亞在美索不達米亞㧯雅各𫱔个子孫，另外還有妹仔底拿。雅各對麗亞所傳下來个子孫總共三十三儕。
16 迦得㧯佢个孻仔：
洗非芸、哈基、書尼、以斯本、以利、亞羅底、亞列利。
17 亞設㧯佢个孻仔：
音拿、亦施瓦、亦施韋、比利亞，
還有佢等个老妹西拉。
比利亞个孻仔係希別㧯馬結。
18以上係拉班給佢个妹仔麗亞做使女个悉帕㧯雅各𫱔个子孫，總共十六儕。
19 雅各个𡜵娘蕾潔㧯佢𫱔兩個孻仔：
約瑟㧯便雅憫。
20 約瑟在埃及㧯希利坡里城个祭司波提非拉个妹仔亞西納𫱔兩個孻仔：
瑪拿西㧯以法蓮。
21 便雅憫个孻仔係：
比拉、比結、亞實別、基拉、乃幔、以希、羅實、母平、戶平、亞勒。
22以上係蕾潔㧯雅各傳下來个子孫，總共十四儕。
23 但㧯佢个孻仔：
戶伸。
24 拿弗他利㧯佢个孻仔：
雅薛、沽尼、耶色、示冷。
25以上係拉班給厥妹仔蕾潔做使女个辟拉㧯雅各傳下來个子孫，總共七儕。
26㧯雅各共下到埃及个直系子孫，總共有六十六儕，無包含心舅。
27再加上約瑟在埃及𫱔个兩個孻仔，雅各全家在埃及个人口總共七十儕。
雅各全家到埃及28 雅各派猶大先到約瑟該位，約佢去歌珊見面。佢等到歌珊个時，
29約瑟坐車到該位迎接厥爸以色列。佢等一見面，約瑟就揇等厥爸，噭盡久。
30以色列對約瑟講：「𠊎有好親眼看到你還在，這下𠊎死也甘願了！」
31後來，約瑟對佢該兜兄弟㧯厥爸屋下其他个人講：「𠊎愛向王報告：『𠊎該兜兄弟㧯吾爸一家人已經對迦南徙到這位來了。
32佢等係牧羊人，靠畜頭牲來生活个，所以佢等帶牛羊㧯所有个財產來到這位。』
33王召見你等，問起你等係做麼介頭路个時，
34你等愛㧯佢講，你等㧯祖先共樣，從後生到這下靠畜頭牲來生活。恁樣，佢就會俾你等住在歌珊地區。」約瑟恁樣講，係因為埃及人無愛㧯牧羊个人來往。
Who We AreWhat We EelieveWhat We Do
2025 by iamachristian.org,Inc All rights reserved.
