1耶穌召集十二個學生來，賜給佢等能力㧯權柄，逐鬼並醫好各種个病，
2然後派佢等出去傳上帝國个福音，也醫治病人。
3佢㧯佢等講：「你等出外个時，毋好帶麼介東西：毋好帶柺棍仔，毋好帶旅行袋，毋好帶食物抑係錢，也毋好加帶一領內衫。
4無論㖠家人肯接待你等，就住在該位，直到你等離開該所在。
5若係該位个人毋接待你等，你等就離開該城市，也愛將腳項个泥粉蹬掉，來表示對佢等个警告。」
6學生就出去，行遍各鄉村，逐所在宣傳福音並醫病。
希律个操煩(馬太 14:1-12；馬可 6:14-29)7 加利利个希律王聽到所發生个一切事，就盡操煩；因為有人講，係施洗約翰返生；
8有人講，係以利亞顯現；也有人講，係古時代个一個先知返生了。
9希律講：「約翰已經被𠊎斬頭，這個人又係麼人哪？樣般𠊎聽到恁多關係佢个事情？」所以佢一直想愛見耶穌。
給五千人食飽(馬太 14:13-21；馬可 6:30-44；約翰 6:1-14)10使徒倒轉來，將佢等所做个一切全部報告耶穌。耶穌就帶等佢等，恬恬仔去到名安到伯賽大个城市。
11眾人一知，就跈等佢去。耶穌就歡迎佢等，對佢等講論關係上帝國个事，又醫好該兜需要醫个人。
12日頭落山个時，十二個學生來見耶穌，對佢講：「請喊大家離開，好俾佢等去附近个村莊尋食个東西㧯住个所在，因為這位盡偏僻。」
13總係耶穌對佢等講：「你等給佢等食！」
學生講：「𠊎等只有五隻餅㧯兩尾魚。敢講你愛𠊎等去買給這恁大群个人食嗎？」
14(該兜人，單淨男人就約有五千儕。)
耶穌對學生講：「喊眾人一排一排坐等，逐排約五十儕。」
15學生照佢个話去做，喊眾人坐下去。
16耶穌將五隻餅㧯兩尾魚拿起來，昂頭望天，感謝上帝，然後擘開，交給學生；學生就分給眾人。
17大家全部食到飽；學生將所賸个碎仔拈起來，裝滿十二隻籃仔。
彼得認耶穌係基督(馬太 16:13-19；馬可 8:27-29)18有一擺，耶穌單淨一儕祈禱个時，學生也同佢在該位。佢問佢等講：「眾人講𠊎係麼人？」
19佢等應講：「有兜講你係施洗約翰；有兜講你係以利亞；也有兜講你係古時代个一個先知返生了。」
20耶穌又問佢等講：「你等呢？你等講𠊎係麼人？」
彼得講：「上帝設立个基督！」
耶穌預言自家个死㧯復活(馬太 16:20-28；馬可 8:30–9:1)21然後，耶穌嚴嚴警告佢等，毋好將這件事對別人講。
22接等，佢又講：「人子一定愛受盡多个苦難；佢會被長老、祭司長㧯經學教師棄絕，也會被人殺害，總係第三日佢會復活。」
23耶穌又對大家講：「想愛跈𠊎个人，就愛放掉自家，逐日擎起佢个十字架來跈𠊎。
24因為想愛救自家生命个人，反轉會喪失生命；為到𠊎喪失生命个人，反轉會得到生命。
25人若係賺到全世界，總係喪失抑係損害自家个生命，有麼介路用呢？當然無！
26無論麼人，因為𠊎㧯𠊎个教訓感覺見笑，人子在佢㧯厥爸並聖天使个榮光中降臨該時，也愛看佢做見笑个人。
27𠊎實在㧯你等講，企在這位个人，有兜在死以前會看到上帝个主權實現！」
改變形像(馬太 17:1-8；馬可 9:2-8)28講這兜話約八日後，耶穌帶等彼得、約翰㧯雅各去山頂祈禱。
29耶穌祈禱个時，佢个面貌改變，衫白到發光。
30忽然，有兩個人出現同佢講話，就係摩西㧯以利亞。
31佢兩儕在榮光中出現，同耶穌講論佢愛在耶路撒冷用死來完成个事。
32彼得㧯兩個同伴已經睡掉去；佢等清醒後，就看到耶穌个榮耀㧯同佢共下企等个兩個人。
33該兩個人愛離開耶穌个時，彼得對耶穌講：「先生，𠊎等在這位盡好！𠊎等來搭三間寮仔，一間給你，一間給摩西，一間給以利亞。」 (佢正經毋知自家係講麼介。)
34佢還講等話个時，有雲出現，遮等佢等。佢等被雲包等个時，學生就盡著驚。
35忽然有聲對雲中傳出來，講：「這係𠊎个孻仔，係𠊎所揀選个。你等愛聽從佢！」
36該聲音停掉以後，只有耶穌一儕在該位。在該兜日仔中，學生恬恬毋識對麼人講起佢等所看到个事。
醫好被鬼附身个細人仔(馬太 17:14-18；馬可 9:14-27)37第二日，佢等對山頂下來个時，有一大群人來迎接耶穌。
38人群中，有一個人喊講：「先生，求你救吾孻仔，因為𠊎只有佢一個孻仔！
39邪靈攻擊佢个時節，使佢忽然間盡喊，害佢歸身抽筋，嘴緊浡泡。邪靈常常恁樣傷害佢，毋肯放佢煞！
40𠊎求若學生逐這個邪靈走，總係佢等無辦法。」
41耶穌應講：「你等這世代个人樣般恁無信心，恁腐敗！𠊎還愛在你等這位幾久呢？還愛忍耐你等幾久呢？」接等，佢對該人講：「將若孻仔帶來這位！」
42細人仔行等來个時，鬼將佢抨落地上，使佢緊抽筋。耶穌就責備該邪靈，醫好細人仔，將佢交還厥爸。
43大家攏總盡希奇上帝个大能。
耶穌再預言自家个死(馬太 17:22-23；馬可 9:30-32)大家對耶穌所做个一切還在希奇个時，耶穌又對厥學生講：
44「毋好毋記得𠊎愛㧯你等講个話：人子會被人交在人个手中。」
45總係佢等毋會了解這話个意思；因為含意不明，佢等無法度想像。佢等又毋敢問佢到底講麼介。
麼人最偉大(馬太 18:1-5；馬可 9:33-37)46學生互相議論，佢等當中到底麼人最偉大。
47耶穌知佢等心中所想个，就喊一個細人仔來，俾佢企在自家个塍頭，
48然後對佢等講：「為到𠊎个名接待這細人仔个，就係接待𠊎；接待𠊎个，就係接待該差𠊎來个。你等當中，麼人係最微細个，麼人就係最偉大个。」
反對抑係贊成(馬可 9:38-40)49 約翰對耶穌講：「先生，𠊎等看到有人奉你个名逐鬼，𠊎等就禁止佢，因為佢毋係跈𠊎等个。」
50耶穌就對佢講：「毋好禁止佢，因為毋係反對你等个，就係贊成你等个。」
毋接待耶穌个村莊51耶穌受接升天个日仔會到了，佢決心愛去耶路撒冷，
52就派使者先行。佢等去到撒馬利亞个一隻村莊，愛為耶穌準備。
53總係該地方个人毋歡迎耶穌，因為佢愛去耶路撒冷。
54厥學生雅各㧯約翰看到這個情形，就講：「主啊，你愛𠊎等喊 天頂个火下來燒滅佢等麼？」
55耶穌轉身責備佢等 。
56佢等就去別个村莊。
愛跈耶穌个人(馬太 8:19-22)57在佢等所行个路上，有一個人對耶穌講：「你無論去到㖠位，𠊎一定愛跈你。」
58耶穌講：「狐狸有窿，鳥仔有藪，總係人子連墊頭个所在也無。」
59耶穌又對另外一個人講：「你來跈𠊎。」
總係該人講：「主啊，准𠊎先轉去埋葬吾爸。」
60耶穌講：「俾死人去埋葬佢等个死人！若係你，你愛去傳上帝國个福音。」
61又有一個人講：「主啊，𠊎愛跈你，總係准𠊎先轉去同屋下人辭別。」
62耶穌對佢講：「手捍等犁仔耕田又緊看後背个人，堪毋得做上帝國个人。」
Who We AreWhat We EelieveWhat We Do
2025 by iamachristian.org,Inc All rights reserved.
