申命記 25 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1「若係有兩個以色列人上法院解決冤家个事，其中一儕被審判官判無罪，另外一儕有罪，

2若係有罪个人應該受鞭刑，審判官愛命令佢當面伏在地上受刑。鞭打个數目愛看犯罪个重輕來定。

3最多打四十下，做毋得超過；若係超過這數目，就係公開侮辱你个同胞。

4「牛踏榖个時，毋好籠等牠个嘴。」

為過身个兄弟留後代

5「若係有兄弟兩儕共下住，其中一儕先死掉，無留下後代，佢个寡婦做毋得再㧯族外人結婚。死者个兄弟愛盡兄弟个義務討姖；

6佢等𫱔个長子愛算做死掉个兄弟个孻仔，免得佢个名在以色列中除掉。

7若係死者个兄弟毋肯討姖，該女人愛到城門口見長老，㧯佢等講：『先夫个兄弟毋肯盡兄弟个義務，留死掉个兄弟个名，代佢在以色列中留後代。』

8本城該兜長老就愛喊該兄弟來，㧯佢商量。若係佢還係堅持講：『𠊎無愛討姖』，

9厥兄弟个寡婦就愛在該兜長老面前行上去，脫下該兄弟个一隻鞋，呸口潾在佢个面，宣佈講：『毋肯代兄弟留後代个人應該受這種侮辱。』

10在以色列中，佢个家愛喊做『被人脫鞋个家。』」

其他條例

11「若係兩個人相打，其中一儕个𡜵娘為到愛救老公離開對方个手，去揢到另外該儕个卵，

12就愛斬斷𡜵娘个手，做毋得憐憫姖。

13「你等个袋仔肚做毋得有一大一細兩樣个秤砣。

14你等屋下做毋得有一大一細兩樣个升斗。

15愛誠實，用正確个秤砣㧯升斗，好俾你等在上主 — 你等个上帝愛賜給你等个土地上享受長壽。

16上主 — 你等个上帝盡惱詐欺个人。」

愛消滅亞瑪力人

17「愛記得，你等出埃及个時，在路途亞瑪力人樣般對待你等。

18佢等毋驚上帝，在你等當𤸁無力个時，對後背攻打，將行在後背个人全部㓾掉。

19所以，當上主 — 你等个上帝將土地賜給你等、使你等無受外敵攪亂、做得享受平安个時，你等愛消滅所有个亞瑪力人，俾人無再想起佢等。毋好毋記得！」