1你等个上帝講：
你等愛安慰𠊎个子民，
愛安慰佢等。
2愛鼓勵耶路撒冷个人民，
㧯佢等講：佢等个苦難已經罅了；
佢等个罪已經得到赦免 。
𠊎 — 上主已經加倍責罰佢等一切个罪。
3有一個聲喊講：
愛在荒埔為上主預備道路 ；
愛在沙漠為𠊎等个上帝開大路。
4所有个山壢全部愛坉滿；
大細山岡全部愛削平。
高低無平个地愛成做平平；
山地愛成做平原。
5該時，上主个榮光愛顯明出來；
全人類一定會共下看到。
因為上主恁樣宣佈了。
6有一個聲喊講：去報消息！
𠊎問：報麼介消息？
愛宣佈講：逐個人攏總像草共樣；
佢等盡靚像野地个花。
7上主吹一陣風，
草就枯燥，花也謝掉。
人實在㧯花草當相像；
8草會燥掉，花會謝掉，
總係𠊎等上帝个話永遠毋會改變！
9 錫安哪，愛上高山；
愛報好消息！
耶路撒冷啊，愛大聲喊；
愛報好消息！
愛大聲喊，毋使驚。
㧯猶大个大細村莊講：
「你等个上帝會來了！」
10看哪，至高个上主愛帶等權柄來；
佢愛用權能治理天下。
佢愛施行報應；
佢愛拯救佢等。
11佢愛像牧人掌羊群；
佢愛聚集細羊仔，
用雙手將牠兜揇在胸前；
佢愛用慈愛帶領餵乳个羊乸。
無人㧯上帝比抑得12麼人做得用手巴掌量海水？
麼人做得用手指量高天？
麼人做得用斗量大地个泥？
麼人做得用天平秤山嶺？
13麼人揣得出上主个心意？
麼人有資格教佢？指導佢？
14敢有人識教佢，指導佢，
使佢知公正个路，
使佢得到智識，
指示佢通達个道？
15在上主來看，列國係水桶中个一滴水，
係天平頂个泥粉；
海島係秤盤頂个塵灰定定。
16 黎巴嫩个樹林毋罅做獻祭个柴；
該位个走獸毋罅做燒化祭。
17列國對佢來講毋算麼介，
像無存在个東西，就係虛空。
18麼人㧯上帝比抑得？
你等愛用麼介代表佢个形像？
19佢無像偶像；
師傅造好偶像後，
又為它包金身，
然後掛幾條銀鍊。
20該買毋起金銀个人
就用毋會歿掉个樹頭。
佢尋來一個手藝當好个師傅，
雕刻一個毋會橫掉个偶像。
21你等敢毋知？你等敢無聽到？
毋係有人早就㧯你等講過？
你等敢毋知這世界係樣般開始？
22上帝坐在大地个穹蒼頂高；
在佢來看，地上个人像草蜢一樣。
佢掀開天像打開布簾，
像展開人所住个帳篷。
23佢消滅有權勢个君王，
使地上个審判官變無掉去。
24佢等像還當細頭个植物，
正發芽生根。
上主吹一陣風，佢等就全部枯燥；
大風一捲，佢等就像禾稈被風吹散。
25麼人做得㧯神聖个上帝比呢？
世間敢有人像佢麼？
26你等昂頭看天頂！
麼人創造這兜星辰？
係上帝！佢帶領它兜像帶領軍隊。
佢知它兜个數目；
佢一個一個點名。
佢个權能極大無比，
連一個也毋會毋見掉。
27 以色列啊，你做麼介怪怨：
恅到上主毋知你个艱苦？
認為上帝無關心你所受个冤枉？
28你敢毋知？你敢無聽講？
上主係永生个上帝！
佢創造全世界。
佢毋會𤸁，也毋會痶；
佢个智慧高深，人無法了解。
29𤸁个人，佢賜力量給佢等；
痶个人，佢賜氣力給佢等。
30後生人會𤸁也會痶；
強壯个青年也會跌倒橫下去。
31總係倚靠上主个人，
會重新得到力量。
佢等會像鷹鳥打開翼胛飛到高高；
佢等走毋會𤸁，
行也毋會痶。
Who We AreWhat We EelieveWhat We Do
2025 by iamachristian.org,Inc All rights reserved.
