出埃及記 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

摩西个出世

1有一個利未族个人㧯佢同族个一個細妹仔結婚，

2𫱔一個孻仔。這婦人家看到孲𤘅仔當得人惜，就將佢囥三個月久。

3到實在無辦法囥這細人仔，姖就拿鹹草編一個籃仔，漆上桐油㧯馬膠，毋俾水漏落去，將細人仔放在籃仔底背，然後將籃仔囥在河壩滣蘆竹中間。

4這細人仔个阿姊遠遠企等，愛看佢會發生麼介事情。

5國王个妹仔到河壩滣來洗身；姖該兜宮女在河壩滣行來行去。忽然姖看到蘆竹中間有一個籃仔，就喊一個奴婢去拿來。

6公主打開籃仔，看到一個孲𤘅仔在底背噭，就憐憫佢，講：「這一定係希伯來人个孲𤘅仔。」

7該時，孲𤘅仔个阿姊行前來，對公主講：「請問，愛𠊎去尋一個希伯來婦人家為你做佢个乳𡟓麼？」

8公主應講：「好啊！」該細阿妹仔就去喊孲𤘅仔个阿姆來。

9公主對該婦人家講：「將這孲𤘅仔帶轉去，代𠊎𢱋佢，𠊎會給你工錢。」所以該婦人家就將孲𤘅仔接轉去，養育佢。

10這細人仔長大以後，該婦人家將佢帶到公主面前，公主正式收養佢做自家个孻仔。姖講：「𠊎對水底背將這細人仔拉上來」。姖就㧯佢安到摩西

。

摩西在米甸流浪

11 摩西長大以後，常常出去看希伯來同胞，看到佢等被人強迫做苦工。有一擺，佢看到一個埃及人打死一個希伯來同胞。

12摩西向左右看，恅到無人注意，就打死該埃及人，將屍體埋在沙堆肚。

13第二日，摩西又到該位去，看到兩個希伯來人相打，就對該個較無理个講：「你做麼介欺負自家个同胞呢？」

14該人應講：「麼人派你來管𠊎等，做𠊎等个法官？你㓾掉該埃及人，也想愛㓾𠊎係麼？」摩西一聽到這話，就非常著驚，心肚想：「𠊎所做个，大家已經知了！」

15-16國王聽到這事，想愛㓾摩西，摩西就逃到米甸去，住在該位。

有一日，摩西坐在井堘。米甸个祭司有七個妹仔，姖等出來打水，裝滿水槽，愛俾阿爸个羊仔食水。

17另外一群掌羊个來，將姖等逐走。摩西就䟘起來保護姖等，又打水俾姖等个羊仔食。

18姖等轉到阿爸流珥

屋下个時，阿爸問姖等：「今晡日樣般會恁早就轉來？」

19姖等應講：「有一個埃及人㧯𠊎等𢯭手，將該兜欺負𠊎等个掌羊人逐走，還代𠊎等打水俾羊仔食。」

20阿爸問該兜妹仔：「佢在㖠位？做麼介將佢留在外背？去請佢來㧯𫣆等共下食飯。」

21後來摩西同意住在該位；該人將厥妹仔西坡拉嫁給摩西；

22西坡拉𫱔一個孻仔。摩西講：「𠊎係暫時住在外邦个旅客」。佢就㧯這細人仔安到革舜

。

23過盡多年，埃及王死掉，以色列人還係過等奴才个生活。佢等向上帝哀求，求佢幫助佢等脫離苦海。

24上帝聽到佢等个求喊，想到佢識㧯佢等个祖先亞伯拉罕、以撒、雅各所立个約。

25上帝看到以色列人做苦工个情況，非常關心佢等。