1後來，𠊎看到四個天使企在地个四隻角頭，擋等地上四面个風，毋俾風吹在地上、海上，抑係樹仔个頂高。
2𠊎又看到另外一個天使，捧等永生上帝个印仔，對東方上來。佢大聲對該領受上帝所賜个權柄、能破壞地㧯海个四個天使喊講：
3「毋好傷害地、海，抑係樹仔，等𠊎等在上帝个眾僕人額頭頂揝印仔。」
4𠊎聽講，在以色列个各支族中受揝印仔个，總數有十四萬四千人：
5 猶大支族中接受揝印仔个，有一萬兩千人；
呂便支族，一萬兩千人；
迦得支族，一萬兩千人；
6 亞設支族，一萬兩千人；
拿弗他利支族，一萬兩千人；
瑪拿西支族，一萬兩千人；
7 西緬支族，一萬兩千人；
利未支族，一萬兩千人；
以薩迦支族，一萬兩千人；
8 西布倫支族，一萬兩千人；
約瑟支族，一萬兩千人；
便雅憫支族，一萬兩千人。
對各所在來个大眾9後來，𠊎一看，又看到一大群个人，數目盡難計算。佢等係對世界各國家、各民族、各種人、㧯各種語言來个，全部企在寶座㧯羔羊个面前，著等白色个長袍，手拿等棕樹枝。
10佢等大聲喊講：
救恩係對坐在寶座上𠊎等个上帝，
㧯羔羊來个！
11所有个天使攏總企在寶座、長老，㧯四個生物个周圍。佢等在寶座个面前伏下來敬拜上帝，
12講：
阿愐！
願頌讚、榮光、智慧、
感謝、尊貴、權能、力量，
全部歸給𠊎等个上帝，
直到永永遠遠！
阿愐。
13有一個長老問𠊎，講：「這兜著白長袍个係麼人？佢等係對㖠位來个？」
14𠊎應講：「先生，你正知。」
佢㧯𠊎講：「這兜人係經歷過大迫害个。佢等識用羔羊个血將自家个長袍洗到白白。
15因為恁樣，佢等在上帝个寶座前，日夜在佢个聖殿中事奉佢。該坐在寶座上个上帝愛親自庇佑佢等。
16佢等毋會再肚飢，也毋會再嘴燥；日頭抑係任何熱氣攏總㸐佢等毋到。
17因為寶座中个羔羊愛牧養佢等，帶佢等到生命水个源頭；上帝也愛拭掉佢等一切个目汁。」
Who We AreWhat We EelieveWhat We Do
2025 by iamachristian.org,Inc All rights reserved.
